काठमाडौँ । बजेट माग्न सिंहदरबार आएको सुदूरपश्चिम प्रदेशको मुख्यमन्त्रीको टोलीले आज प्रधानमन्त्री पुष्पकमल दाहाललाई भेट्ने भएको छ ।
मुख्यमन्त्री कमलबहादुर शाह नेतृत्वको टोलीले हिजो राष्ट्रिय योजना आयोगका उपाध्यक्ष मीनबहादुर श्रेष्ठसँग भेट गरी आगामी आर्थिक वर्षको बजेटमा सुदूरपश्चिम प्रदेशलाई प्राथमिकतामा राख्न आग्रह गरेको थियो ।
मुख्यमन्त्री शाह, प्रमुख प्रतिपक्षी दलका नेताका साथै मन्त्रीहरुसहितको टोली काठमाडौँ आइपुगेको हो । उक्त टोलीले आज विहान प्रधानमन्त्री दाहाललाई उहाँकै निवास बालुवाटारमा भेट्ने भएको हो ।
टोलीले हिजो अर्थमन्त्री प्रकाशशरण महतसमेतलाई भेट गरी बजेटमा प्राथमिकता दिन ध्यानाकर्षण गराएको थियो । टोलीले आज प्रधानमन्त्रीसँगै प्रमुख प्रतिपक्षी दलका नेतालाई पनि भेट गर्ने कार्यक्रम छ ।
संघीय सरकारको आँखामा सुदूरपश्चिम पछाडि पारिएको र स्रोत बाँडफाँटमा बहिष्करणमा नै पारिएको भन्दै सुदूरपश्चिम प्रदेश सरकारको प्रतिनिधिमण्डल यहाँ आइपुगेको हो । टोलीमा मुख्यमन्त्री शाह, प्रमुखप्रतिपक्षी दलका नेता राजेन्द्रबहादुर रावल, सभामुख भीमबहादुर भण्डारीका साथै मन्त्रीहरु हुनुहुन्छ ।
