काठमाडौँ । नेपाली नागरिकलाई नक्कली भुटानी शरणार्थी बनाई अमेरिका पठाउने प्रकणमा नेपाल प्रहरीले ३० जनाविरुद्ध मुद्दा चलाउन सिफारिस गरेको छ । अनुसन्धान पूरा गरी काठमाडौँ जिल्ला सरकारी वकिलको कार्यालयमा सोमबार बुझाएको रायसहितको प्रतिपवेदनमा प्रहरीले त्यस्तो सिफारिस गरेको हो ।
जिल्ला प्रहरी परिसर काठमाडौँले २०७९ चैत १२ गतेदेखि सुरु गरेको अनुसन्धान ५८ दिनमा पूरा गरेको हो । नक्कली भुटानी शरणार्थी प्रकरणमा कतिपय अभियुक्तविरुद्ध जाहेरी आउन सक्ने र संगठित अपराधमा संलग्न अन्य आरोपितलाई समेत कानूनी दायरामा ल्याउन मिल्ने गरी पूरक प्रतिवेदन पुनः पेस गर्ने विकल्पसहितको अनुसन्धान प्रतिवेदन बुझाएको परिसरले जनाएको छ ।
परिसर प्रमुख दानबहादुर कार्कीले अनुसन्धान प्रतिवेदनमा ३० जना अभियुक्तले २७ करोड ५० लाख ७४ हजार पाँच सय रुपैयाँ ठगी गरेको पाइएको जानकारी दिनुभयो । उहाँले नक्कली भुटानी शरणार्थी प्रकरणको अनुसन्धानका क्रममा २३ वटा उजुरीमार्फत् ११३ जना पीडितले जाहेरी दिएको जानकारी दिनुभयो । जिल्ला सरकारी वकिलको कार्यालयमा बुझाइएको १७८ पृष्ठको रायसहितको प्रतिवेदनमा पक्राउ परेका १६ जना र पक्राउ पुर्जी जारी भएपछि फरार १४ जनामाथि संगठित उपराध, ठगी र राज्यविरुद्धको कसुरमा मुद्दा चलाउनुपर्ने राय पेस गरिएको छ । यो समाचार आजको गोरखापत्रमा प्रकाशित छ ।
