एजेन्सी । इन्डियन प्रिमियर लिग (आईपीएल) २०२३ मा बिहीबार रोयल च्यालेन्जर्स बैंग्लोरले सनराइजर्स हैदरावादलाई ८ विकेटले पराजित गर्यो ।
टस हारेर पहिले ब्याटिङ गरेको हैदरावादले २० ओभरमा पाँच विकेट गुमाएर १८६ रन बनाएको थियो । हेनरिक क्लासेनले ५१ बलमा ८ चौका र ६ छक्का प्रहार गर्दै १०४ रनको इनिङ खेले ।
जवाफमा बैंग्लोरले १९.२ ओभरमा दुई विकेट गुमाएर लक्ष्य पूरा गर्यो । विराट कोहलीले ६३ बलमा १२ चौका र चार छक्का प्रहार गर्दै १०० रनको इनिङ खेले । यो म्याच जित्ने इनिङ्सपछि कोहलीले आफ्नो जीवनमा सबैभन्दा विशेष मान्ने मान्छेलाई फोन गरे ।
खेल सकिएपछि कोहलीले मैदानबाट श्रीमती अनुष्का शर्मालाई भिडियो कल गरे । उनीसँग लामो समय कुरा गरे । यी दुईबीचको कुराकानीका धेरै तस्विरहरु सार्वजनिक भएका छन् । सामाजिक सञ्जालमा फ्यानहरूले पनि यो स्टार जोडी र यो क्षणको धेरै तारिफ गरिरहेका छन् ।
भिडियो कलको तस्बिर सेयर गर्दै एक सामाजिक सञ्जाल प्रयोगकर्ताले लेखेका छन्– ‘म्याचको सबैभन्दा सुन्दर क्षण ।’ लामो समयपछि आईपीएलमा शतक बनाएपछि विराटले अनुष्काको अगाडि आफ्नो खुशी व्यक्त गरिरहेका थिए । अर्को प्रयोगकर्ताले यसमा लेखेका छन्– ‘किंग कोहली, अनुष्कालाई तिमीमा गर्व हुनेछ ।’
अनुष्काले इन्स्टाग्राममा कोहलीको लागि एउटा स्टोरी पनि पोस्ट गरेकी छिन् । यसमा उनले कोहलीको छैटौं आईपीएल शतकका केही झलकहरू सेयर गरेकी छन् । यसको क्याप्शनमा अनुष्काले कोहलीको इनिङ्सलाई धमाकाको रूपमा वर्णन गरेकी छिन् । उनले लेखेकी छन्– ‘यो कस्तो विशेष इनिङ्स थियो !’
बिहीबार हैदरावादविरुद्धको खेलमा अनुष्का रंगशालामा देखिएनन् । यसअघि उनी लगभग हरेक खेलमा कोहली र आरसीबीलाई समर्थन गर्न स्टेडियम पुगेकी थिइन् । कोहली र अनुष्काले २०१७ मा विवाह गरेका थिए र त्यसपछि दुवैले हरेक कठिन समयमा एकअर्काको साथ दिँदै आएका छन् ।
कोहलीको यो आईपीएलमा छैटौं शतक हो । उनले आईपीएलमा सर्वाधिक शतक बनाउने क्रिस गेलको रेकर्ड बराबरी गरेका छन् । गेल र कोहलीको समान ६–६ शतक भएको छ ।
