काठमाडौँ । जनता समाजवादी पार्टीका सांसद राजकिशोर यादवले नक्कली भुटानी शरणार्थी प्रकरण सामान्य भ्रष्टाचार नभई देशद्रोह भएको बताउनु भएको छ ।
सोमबार प्रतिनिधिसभा बैठकमा आकस्मिक समय लिएर बोल्दै उहाँले सो प्रकरणका दोषीलाई कारबाहीको दायरामा ल्याउन पनि सम्बन्धित सबै पक्षले सक्रियतापूर्वक ध्यान दिनुपर्ने बताउनु भयो ।
सांसद यादवले यो प्रकरणले सिंगो राजनीतिक वृत्तमा नै अविश्वासको वातावरण सृजना गरिरहेको उल्लेख गर्दै त्यसलाई त्यही रुपमा लिई अनुसन्धानको प्रक्रिया अघि बढाउनुपर्ने बताउनु भयो । उहाँले भन्नु भयो, ‘अहिले सर्वाधिक चर्चाको विषय रहेको नक्कली भुटानी शरणार्थी प्रकरण छ । यसलाई सामान्य भ्रष्टाचार हो भन्ने भाष्य निर्माण गर्न खोजिदैछ । त्यसैले यो सामान्य भ्रष्टाचार होईन । यो देशद्रोह हो । यसले आज सबै राजनीतिक वृत्तमा एउटा अविश्वासको वातावरण सृजना गरेको छ ।
र, यसलाई त्यही रुपमा लिई यो राष्ट्र द्रोह हो । त्यही रुपमा लिई यसलाई दोषीलाई कानुनी कठघरामा ल्याउनका लागि सरोकारवाला पक्षले सक्रियतापूर्वक ध्यान दिनुपर्ने आवश्यक्ता देखिन्छ । साथसाथै अहिले जसरी ठूला देलका नेताहरु दिनहुँ भेटिरहेका छन । र, आम जनमानसमा एउटा शंका निर्माण हुने अवस्था सृजना भएको छ ।’
सांसद यादवले सो प्रकरणलाई निस्तेज पार्न ठूलो दलका नेताहरु सक्रिय भईरहेको आशंका पनि व्यक्त गर्नु भयो ।
