एजेन्सी । इंन्डियन प्रिमियर लिग (आईपीएल) अन्तर्गत लखनउ सुपरजायन्ट्सले सनराइजर्स हैदरावादलाई पराजित गरेको छ ।
शनिबार साँझ सम्पन्न खेलमा लखनउले हैदरावादलाई उसकै मैदानमा ७ विकेटले पराजित गरेको हो । १८३ रनको लक्ष्य पछ्याएको लखनउले १९.२ ओभरमा ३ विकेटको क्षतिमा लक्ष्य भेट्टायो ।
लखनउको जितमा निकोलस पुरनले तुफानी ब्याटिङ गरे । उनले १३ बलमा ४४ रन जोडे । क्रिजमा आउनेवित्तिकै पुरनले लगातार तीन छक्का प्रहार गर्दै लखनउलाई जिततर्फ अघि बढाएका थिए । उनले ४ छक्का र ३ चौका प्रहार गरे ।
यस्तै, प्रेरक मांकडले ४५ बलमा ६४ रनको अर्धशतकीय इनिङ्स खेले । उनले ७ चौका र २ छक्का प्रहार गरे । मार्कुस स्टोइनिसले २५ बलमा ४० रनको योगदान दिँदा क्वीन्टन डी ककले १९ बलमा २९ रन जोडे । हैदरावादको बलिङतर्फ ग्लेन फ्लिप्स, मयंक मार्कन्डे र अभिषेक शर्माले एक–एक विकेट लिए ।
त्यसअघि टस जितेर पहिले ब्याटिङ थालेको हैदरावादले २० ओभरमा ६ विकेटको क्षतिमा १८२ रन बनाएको थियो । हैदरावादका लागि हेन्रिक क्लासेनले २९ बलमा ४७, अनमोलप्रीत सिंहले २७ बलमा ३६ रन जोड्दा अब्दुल समद २५ बलमा ३७ रनमा अविजित रहे ।
यस्तै, एडेन मार्करमले २० बलमा २८ रन जोडे । राहुल त्रिपाठीले १३ बलमा २० रन जोडे । लखनउका लागि बलिङतर्फ क्रुणाल पाण्ड्याले दुई विकेट लिए भने युधवीर सिंह, आवेश खान, यश ठाकुर र अमित मिश्राले एक–एक विकेट लिए ।
