एजेन्सी । सूर्यकुमार यादव (४९ बलमा नटआउट १०३ रन)को शतकको मद्धतमा मुम्बई इन्डियन्सले इन्डियन प्रिमियर लिग (आईपीएल)–२०२३ मा साविक विजेता गुजरात टाइटन्सलाई २७ रनले पराजित गरेको छ ।
यो जितसँगै मुम्बईले तालिकाको तेस्रो स्थानमा आफ्नो स्थान सुरक्षित गरेको छ । मुम्बईको खातामा १४ अंक छ र प्लेअफबाट ३ अंक टाढा छ भने प्लेअफको दौडमा उभिएको गुजरातको प्रतिक्षा बढेको छ । टोली छनोटबाट एक अंक टाढा छ ।
शुक्रबार वानखेडे स्टेडियममा गुजरातले टस जितेर बलिङ रोजेको थियो । टस जितेर पहिले ब्याटिङ गरेको मुम्बईले २० ओभरमा ५ विकेट गुमाएर २१८ रन बनाएको थियो । जवाफमा गुजरातले २० ओभरमा ८ विकेट गुमाएर १९१ रन मात्रै बनाउन सक्यो ।
अफगानिस्तानका बलर राशिद खान र अल्जारी जोसेफले आईपीएल इतिहासमा ९औं विकेटका लागि सबैभन्दा ठूलो साझेदारी गरेका छन् । दुवैले ४० बलमा ८८ रन जोडे । यसअघि यो कीर्तिमान इमरान ताहिर र साम करणको नाममा थियो । दुवैले २०२० सिजनमा मुम्बईविरुद्ध शारजाह मैदानमा ३१ बलमा ४३ रन जोडेका थिए ।
पहिले ब्याटिङ गरेको मुम्बईका इशान किशन (३१ रन) र कप्तान रोहित शर्मा (२९ रन)ले अर्धशतकीय साझेदारी गर्दै टोलीलाई उत्कृष्ट सुरुवात गराए । तेस्रो नम्बरमा खेल्न आएका सूर्यकुमार यादवले अविजित १०३ रन बनाए । सूर्यकुमारले ११ चौका र ६ छक्का प्रहार गरे । विष्णु विनोदले ३० रनको योगदान दिए । गुजरातका लागि राशिद खानले ४ विकेट लिए । मोहित शर्माले एक विकेट लिए ।
२१९ रनको लक्ष्य पछ्याएको गुजरातको सुरुवात राम्रो हुन सकेन । टोलीले २६ रनमा तीन विकेट गुमाएको थियो । ओपनर ऋद्धिमान साह २, शुभमन गिल ६ र कप्तान हार्दिक पाण्ड्या ४ रन बनाएर आउट भए । विजय शंकरले २९ र डेभिड मिलरले ४१ रनको योगदान दिए । तल्लो क्रममा आएर राशिद खानले ३२ बलमा ७९ रन बनाएर जितको अन्तर घटाए । राशिदले १० छक्का र तीन चौका प्रहार गरे । अल्जारी जोसेफसँग ४० बलमा अविजित ८८ रनको साझेदारी गरे ।
गुजरातका लागि बलिङतर्फ आकाश मधवालले तीन, पियुष चावला र कुमार कार्तिकेयले दुई–दुई विकेट लिए भने जासन बेहन्डर्फले एक विकेट लिए ।
