एजेन्सी । इन्डियन प्रिमियर लिग (आईपीएल)अन्तर्गत लिग चरणको ५७ औं खेल आज मुम्बई इन्डियन्स (एमआई) र गुजरात टाइटन्स (जीटी)बीच हुँदैछ ।
खेल मुम्बईको वानखेडे स्टेडियममा साँझ ७ः४५ बजे सुरु हुनेछ । यस मैदानमा दुवै टोली पहिलो पटक आमनेसामने हुँदैछन् ।
सन् २०१५ देखि २०२१ सम्म ६ वर्ष एउटै टिमबाट खेलेका हार्दिक पाण्ड्या र रोहित शर्मा आज छुट्टाछुटै टिमको कप्तानी सम्हाल्दैछन् । रोहितले मुम्बईको कप्तानी सम्हाल्दा हार्दिकले गुजरातको कप्तानी गर्दैछन् । हार्दिकको कप्तानीमा गुजरातले पहिलो सिजनमै उपाधि जितेको थियो । गुजरातको यो दोस्रो सिजन हो ।
दुवै टोली सिजनमा दोस्रो पटक भिड्नेछन् । यसअघि दुवै टोली लिग चरणको ३५औं खेलमा पनि आमनेसामने भएका थिए । जसमा गुजरात ५५ रनले विजयी भएको थियो ।
मुम्बईले यो सिजन अहिलेसम्म खेलेका ११ खेलमध्ये ६ मा जित र ५ मा हार बेहोरेको छ । टोलीको १२ अंक छ । गुजरातविरुद्धको टोलीका ४ विदेशी खेलाडी क्यामरुन ग्रीन, टिम डेभिड, क्रिस जोर्डन र जेसन बेहरेनडर्फ हुन सक्छन् । यी बाहेक पियुष चावला, इशान किशन र सूर्यकुमार यादवजस्ता खेलाडीले पनि उत्कृष्ट प्रदर्शन गरिरहेका छन् ।
गुजरातले यो सिजन अहिलेसम्म खेलेका ११ खेलमध्ये ८ जित र ३ खेलमा हार बेहोरेको छ । टोलीको १६ अंक छ । मुम्बईविरुद्धको टोलीका ४ विदेशी खेलाडी डेभिड मिलर, राशिद खान, नूर अहमद र अल्जारी जोसेफ हुन सक्छन् । यी बाहेक मोहम्मद शामी, शुभमन गिल र मोहित शर्मा जस्ता खेलाडीले बलियो प्रदर्शन गरिरहेका छन् ।
मुम्बई र गुजरातबीचको समग्र हेड–टू–हेडको बारेमा कुरा गर्दा, दुबै टोली दुई पटक आमनेसामने भएका छन् । जसमा मुम्बईले एक र गुजरातले एक जित हात पारेको छ ।
वानखेडे रंगशालाको पिच ब्याट्सम्यानका लागि सहयोगी सावित भएको छ । बलरहरूले यस मैदानमा रन रोक्न निकै संघर्ष गर्नुपरेको छ । आजको दिन मुम्बईको मौसम निकै तातो हुने भएको छ । शुक्रबार मुम्बईको तापक्रम २९ डिग्री सेल्सियसको आसपास हुनेछ ।
दुबै टिमका सम्भावित सुरुवाती–११
मुम्बई इन्डियन्सः रोहित शर्मा (कप्तान), इशान किशन, क्यामरन ग्रीन, सूर्यकुमार यादव, टिम डेभिड, नेहल वढेरा, क्रिस जोर्डन, पियुष चावला, आकाश मधवाल, कुमार कार्तिकेय र जेसन बेहरेन्डर्फ ।
गुजरात टाइटन्सः हार्दिक पाण्ड्या (कप्तान), ऋद्धिमान साहा, शुभमन गिल, विजय शंकर, डेभिड मिलर, अभिनव मनोहर, राहुल तेवाटिया, राशिद खान, नूर अहमद, मोहम्मद शामी र मोहित शर्मा ।
