एजेन्सी । इन्डियन प्रिमियर लिग (आईपीएल)को ५६ औँ खेलमा राजस्थान रोयल्सले यशस्वी जैसवालको विस्फोटक इनिङ्सको मद्दतमा कोलकाता नाइट राइडर्सलाई ९ विकेटले पराजित गरेको छ ।
बिहीबार इडेन गार्डेन स्टेडियममा टस हारेर पहिले ब्याटिङ गरेको केकेआरले २० ओभरमा ८ विकेट गुमाएर १४९ रन बनाएको थियो ।
जवाफमा जैसवालले ४७ बलमा ९८ रनको नटआउट इनिङ खेल्दै आरआरलाई १३.१ ओभरमै (४१ बल बाँकी छँदै) जित दिलाए ।
सञ्जु सामसन २९ बलमा ४८ रन बनाएर नटआउट रहे । सामसन र जैसवालले १२१ रनको अविजित साझेदारी गर्दै १३.१ ओभरमा टिमलाई जित दिलाए । यो जितसँगै राजस्थान रोयल्स अंक तालिकाको तेस्रो स्थानमा उक्लिएको छ । यता, कोलकाताको भने प्लेअफमा पुग्न कठिनाइ बढेको छ ।
टस हारेर पहिले ब्याटिङ गरेको कोलकाताको सुरुवात खराब रह्यो । उसलाई ट्रेन्ट बोल्टले शुरुवाती ओभरमा २ झट्का दिए र दुबै ओपनरका विकेट लिए । टोलीले पहिलो ६ ओभरमा ३७ रन मात्र जोड्न सक्यो । मध्य ओभरमा राजस्थानका युजभेन्द्र चहलले केकेआरका ब्याट्सम्यानलाई खुलेर खेल्न दिएनन् । उनले ४ विकेट लिए भने कोलकाताले २० ओभरमा १४९ रन मात्र जोड्न सकेको थियो ।
कोलकाताका लागि वेंकटेश अय्यरले ५७ रन बनाए । उनी बाहेक अरु कुनै ब्याट्सम्यानले ठूलो इनिङ खेल्न सकेनन् । टिमका तर्फबाट जेसन रोयले १०, रहमानउल्लाह गुरबाजले १८, नितिश राणाले २२, आन्द्रे रसेलले १०, रिंकु सिंहले १६, शार्दुल ठाकुरले १ र सुनिल नारायणले ६ रन बनाए । अनुकुल रोय ६ रनमा नटआउट रहे । राजस्थानका युजभेन्द्र चहलले ४ विकेट लिए । उनीबाहेक ट्रेन्ट बोल्टले २ तथा सन्दीप शर्मा र केएम आसिफले १–१ विकेट लिए ।
कोलकाताविरुद्ध ४ विकेट लिएर युजभेन्द्र चहल आईपीएल इतिहासमा सर्वाधिक विकेट लिने खेलाडी बनेका छन् । उनले १४३ खेलमा १८७ विकेट लिएका छन् । चहलपछि वेस्ट इन्डिजका ड्वेन ब्राभो १८३ विकेट लिएर दोस्रो स्थानमा छन् । चहल यो सिजनको सर्वाधिक विकेट लिने खेलाडीको अग्रपंक्तिमा छन् । उनले १२ खेलमा २१ विकेट लिइसकेका छन् ।
१५० रनको लक्ष्य पछ्याएको राजस्थानले यशस्वी जैसवालले धमाकेदार सुरुवात गरेको थियो । इनिङ्सको पहिलो २ बलमा २ छक्का प्रहार गरेपछि उनले पहिलो ओभरमा २६ रन बनाए । उनले दोस्रो र तेस्रो ओभरमा पनि ठूला प्रहार गरे र १३ बलमा आफ्नो अर्धशतक पूरा गरे । यशस्वी ४७ बलमा ९८ रन बनाएर नटआउट रहे ।
यो आईपीएल इतिहासमा सबैभन्दा छिटो अर्धशतक हो । यसअघि यो कीर्तिमान केएल राहुल र प्याट कमिन्सको नाममा थियो । राहुलले २०१८ मा अर्धशतक र २०२२ मा कमिन्सले १४ बलमा अर्धशतक पूरा गरेका थिए ।
