काठमाडौँ । सार्वजनिक पद धारणा गरेका व्यक्तिले अवकाश पाएपछि भ्रष्टाचार मुद्दा चलाउन नमिल्ने भ्रष्टाचार निवारण विधेयकको व्यवस्था हटाउन सांसदहरुले संशोधन दर्ता गर्नुभएको छ । राष्ट्रिय सभाबाट पारित भइ प्रतिनिधि सभामा विचाराधिन रहेको विधेयकमा २१ वटा संशोधन दर्ता भएको आजको गोरखापत्रमा समाचार छ ।
अधिकांश सांसदले मुद्दा चलाउने अवधि (हदम्याद) हटाउन संशोधन दर्ता गर्नुभएको छ । नेपाली कांग्रेस, नेकपा (एमाले), नेकपा (माओवादी केन्द्र)का सांसदहरुले उक्त प्रस्ताव दर्ता गराउनुभएको हो ।
केही सांसदहरुले सार्वजनिक पद धारणा गरेको व्यक्ति सेवामा रहँदा भ्रष्टाचार मुद्दा अख्तियारले हेर्न नपाउने भएमा अवकाशपछि अनुसन्धान र मुद्दा चलाउन पाउने व्यवस्थासमेत थपको संशोधान गर्नुभएको छ , कांग्रेस सांसद गगन थापा, बद्री पाण्डे र जीवन परियाले उक्त संशोधन दर्ता गर्नुभएको हो । अहिले न्यायाधीशलगायतलाई सेवामा रहँदा अख्तियारले अनुसन्धान र तहकिकात गर्दैन ।
