काठमाडौँ । काठमाडौँमा जारी एसिसी मेन्स प्रिमियर कपको फाइनल खेलमा यूएई अलआउट भएको छ ।
र्कीतिपुरस्थित त्रिभुवन विश्वविद्यालयको क्रिकेट मैदानमा यूएईले आज थप ११ रनमात्रै जोड्न सक्यो । अन्तिम विकेटका रुपमा ललित राजवंशीले जुनैद सिद्दिकीलाई आउट गरेपछि यूएई सस्तैमा समेटिएको हो । नेपाल केही बेरमा जवाफी ब्याटिङ उत्रनेछ । हिजो वर्षाका कारण खेल रोकिएपछि आज सोही खेललाई निरन्तरता दिइएको हो ।
नेपाल क्रिकेट संघ (क्यान)ले आजको खेलमा दर्शकलाई निःशुल्क प्रवेश दिएको छ । टस हारेर पहिले ब्याटिङ गरेको यूएईले वर्षाले खेल अवरुद्ध गर्नुअघि हिजो २७.३ ओभरमा ९ विकेट गुमाउँदै १०६ रन बनाएको थियो । सोही खेललाई आज निरन्तरता दिइएको हो ।
यूएईलाई सस्तैमा समेट्ने क्रममा ललित राजवंशीले चार विकेट लिए भने करण केसी र सन्दीप लामिछानेले समान दुई विकेट लिए । साथै सोमपाल कामी, गुलसन झाले पनि एक एक विकेट लिए । यूएईका लागि सबैभन्दा बढी आसिफ खानले ४६ रन बनाए । साथै आर्यान लार्काले १३, मुहम्मद वासिमले ११ रन बनाए भने जहुर खान र वासिल हमिदले समान १० रन बनाए ।
आज पनि वर्षाको उत्तिकै सम्भावना छ । यदी आज पनि वर्षाका कारण खेल हुन सकेन भने नतिजा सुपर ओभरका आधारमा निकालिनेछ । वर्षाका कारण सुपर ओभर पनि सम्भव नभएमा नेपाल ओडीआई बरियताका आधारमा स्वतः एसिया कपका लागि छनोट हुनेछ । ओडीआई बरियतामा नेपाल १४औँ र यूएई १९औँ स्थानमा छन् ।
