एजेन्सी । इन्डियन प्रिमियर लिग (आईपीएल) २०२३ को ४० औं खेलमा सनराइजर्स हैदरावादले दिल्लीलाई ९ रनले पराजित गरेको छ । दिल्लीसँग लगातार ५ पराजयपछि हैदरावादको यो पहिलो जित हो । टोलीले दिल्लीलाई उसकै घरेलु मैदानमा पराजित गरेको हो । यो सिजन हैदरावादको तेस्रो जित हो भने दिल्लीको छैटौं हार हो ।
अरुण जेटली रंगशालामा टस जितेर पहिले ब्याटिङ गरेको हैदरावादले २० ओभरमा ६ विकेट गुमाएर १९७ रन बनाएको थियो । १९८ रनको लक्ष्य पछ्याएको दिल्लीका ब्याट्सम्यानले २० ओभरमा ६ विकेट गुमाएर १८८ रन मात्रै बनाउन सके ।
दिल्ली–हैदरावबदको खेलमा पाहुना टोलीका स्पिनरहरूले फरक पारे । १९८ रनको लक्ष्य पछ्याएको दिल्लीका मिचेल मार्श (३९ बलमा ६३) र फिल साल्ट (३५ बलमा ५९) ले कप्तान वार्नर शून्य रनमा आउट भए पनि दिल्लीलाई बलियो सुरुवात गराए । दुवैले ६६ बलमा ११२ रन जोडे ।
एक समय यो जोडीले हैदरावादलाई पछाडी पार्छ भन्ने लाग्थ्यो, तर हैदरावादका स्पिनरहरूले मार्स(साल्टलाई पेभिलियन मात्रै फर्काएनन्, प्रियम गर्ग (१२ रन)लाई पनि खेल्ने मौका दिएनन् । दिल्लीका ६ मध्ये ४ विकेट स्पिनरले लिए ।
यसअघि हैदरावादले अभिषेक शर्मा (३६ बलमा ६७ रन) र हेनरिक क्लासेन (२७ बलमा ५३) को अर्धशतकीय पारीमा १९७ रनको चुनौतीपूर्ण स्कोर बनाएको थियो । दिल्लीका मिचेल मार्सले चार विकेट लिए । इशान्त शर्मा र अक्षर पटेलले एक–एक विकेट लिए ।
खेलको पावरप्लेमा दिल्ली बलियो थियो । शून्यमा कप्तान वार्नरको विकेट गुमाए पनि टोलीले ६ ओभरमा ५७ रन बनाएको थियो भने हैदरावादले ६२ रनमा दुई विकेट गुमाएको थियो ।
पहिलो ओभरमा डेभिड वार्नरको विकेट गुमाएपछि दिल्लीको इनिङ्सलाई मिचेल मार्स र फिलिप साल्टले सम्हालेका थिए । दुवैले ६६ बलमा ११२ रनको साझेदारी गरे । साल्ट ३५ बलमा ५९ रन बनाएर आउट भए र यो साझेदारी टुट्यो । मार्स पनि ३९ बलमा ६५ रन बनाएर आउट भए । प्रियम गर्गले दिल्लीका लागि र अकिल हुसेनले हैदरावादका लागि डेब्यु गरे ।
हैदरावाद ८ खेलबाट ६ अंकका साथ तालिकाको आठौं स्थानमा छ । यस्तै, दिल्ली समान खेलबाट ४ अंकका साथ १० औं (पुछारमा) छ ।
