काठमाडौं । एसिसी प्रिमियर कपमा ओपनर जतिन्दर सिंहको सानदार शतकमा ओमानले मलेसियालाई ८ विकेटले पराजित गरेको छ ।
मलेसियाले जितको लागि दिएको २ सय २८ रनको मध्यम विजयी लक्ष्य ओमानले ४१.४ ओभरमा २ विकेट गुमाउँदै पूरा गर्यो ।
ओमानको जितमा जतिन्दर १ सय १ रनमा नटआउट रहे । उनले १ सय ११ बलमा १३ चौका र १ छक्का प्रहार गरे । कप्तान जिशान मकसुदले ५२ रनको अर्धशतकीय इनिङ खेले। दोस्रो विकेटका लागि जिशान र जतिन्दरले १ सय रनको साझेदारी गरेका थिए ।
ओपनर कश्याप प्रजापति ६६ रनमा आउट भए । पहिलो विकेटका लागि कश्याप र जतिन्दरले १ सय २३ रनको शतकीय साझेदारी गरेका थिए ।
मलेसियाको तर्फबाट बलिङ गरेका मोहम्मद आमिरले ६ ओभरमा २६ रन खर्चेर २ विकेट लिए ।
त्यसअघि माथिल्लो मुलपानी मैदानमा टस हारेर पहिला ब्याटिङ गरेको मलेसियाले निर्धारित ५० ओभरमा ९ विकेट गुमाएर २ सय २७ रन बनाएको थियो । मलेसियाका लागि विरनदीप सिंहले ९४ रन बनाएका थिए । उनी १ सय ४४ बलमा १३ चौका प्रहार गर्दै ९४ रनमा आउट भए । यस्तै, मोहम्मद स्याहादतले ५५, मोहम्मद आमिर २०, सैद अजिज १८ र मोहम्मद वाफिकले १९ रन बनाए ।
ओमानका जिशान मकसुदले ४ विकेट लिए भजे बिलाल खान र आयन खानले समान दुई दुई विकेट लिए ।
