काठमाडौँ । एसिसी प्रिमियर कप एकदिवसीय क्रिकेट प्रतियोगिताअन्तर्गत संयुक्त अरब इमिरेट्स (युएई)ले विजयी सुरुवात गरेको छ ।
कीर्तिपुरस्थित त्रिभुवन विश्वविद्यालयको क्रिकेट मैदानमा सम्पन्न आफ्नो पहिलो खेलमा यएईले कुवेतलाई १४३ रनले पराजित गरेको हो ।
जितका लागि ३७२ रनको विशाल लक्ष्य पछ्याएको कुवेतले ३६.३ ओभरमा अलआउट हुँदै २२८ रनमात्रै बनाउन सक्यो ।
कुवेतका सायद मोनीवले सर्वाधिक ६८ रन जोडे । ३६ बल खेलेका उनले ५ चौका र ६ छक्का प्रहार गरे । यस्तै, परविन्दर कुमारले २६ बलमा ५३ रन जोड्दा मोहम्मद असलामले ३३, उस्मांगनी इब्राहिमले १६, यसिन पटेलले १४ र मीत भावसारले १० रन जोडे ।
युएईका लागि बलिङतर्फ जुनैद सिद्धिकी र कार्तिक मियप्पनले तीन–तीन विकेट लिँदा सञ्चीत शर्मा, आयान अफजल खान, जहुर खान र रोहन मुस्ताफाले एक–एक विकेट लिए ।
त्यसअघि टस हारेर पहिले ब्याटिङको निम्तो पाएको युएईले निर्धारित ५० ओभरमा ६ विकेट गुमाएर ३७१ रनको योफगल बनाएको थियो । युएईका लागि वृत्य अरविन्द र रोहन मुस्ताफाले शतक प्रहार गरे । अरविन्दले एक सय ४७ बलमा १७ चौका र ९ छक्काको मद्दतमा सर्वाधिक १८५ रन बनाए ।
त्यस्तै मुस्ताफाले एक सय २५ बलमा १० चौका र चार छक्काको मद्दतमा ११८ रन बनाए । आसिफ खानले ३० रन जोडे ।
कुवेतका लागि शाहरुख क्युदुस परविन्दर कुमारले दुई विकेट लिए भने यासिन पटेल र सायद मोनिबले समान एक–एक विकेट लिए ।
