काठमाडौँ । निर्देशक तथा कवि उपेन्द्र सुब्बाले देशको शैक्षिक अवस्थाप्रति चिन्तन व्यक्त गरेका छन् । विद्यालयले कमजोर विद्यार्थीहरु प्रति गरिने दुर्व्यवहार र अपमानप्रति उनले गुनासो पोखेका छन् ।
निर्देशक सुब्बाले जाउलाखेलस्थित डिएभी स्कुलले आफ्नी माइली छोरीलाई अपमान गरेको बताएका छन् । कक्षा २ बाट सोही स्कूलमा पढ्दै आएकी छोरीलाई नौ कक्षामा फेल भएपछि प्रिन्सिपलले सो विद्यालयमा नपढाउने अन्त लानु भनेका सुब्बाले सामाजिक सञ्जालमा उल्लेख गरेका छन् । उनले भनेका छन्, ‘भाइस प्रिन्सिपल सहित अरु दुईजनाले गिज्याएर हाँस्दै, होच्याएर, हेपेर यो बच्चालाई हामी पढाउन सक्दैनौं । अन्त स्कुल लानु यहाँ यिनलाई सिकाउने कुनै ओैषधि छैन । यिनले पढ्नै सक्दैन भनेछन्।’
सुब्बाले ८-९ वर्षदेखि एउटै विद्यालयम पढेको विद्यार्थी कमजोर हुनुमा स्कुलको पनि दोष हुन्छ कि विद्यार्थीको मात्रै भनेर प्रश्न गरेका छन् । उनले कमजोर विद्यार्थीलाई हामी पढाउन सक्दैनौं अन्तै लैजाउ भन्नु स्कुलको गैर जिम्मेवारी भएको बताए ।
उनले भनेका छन्, ‘कक्षा २ बाट सोही स्कूलमा पढ्दै आएको मेरो छोरीलाई अपमान गर्दै पढ्न जान्दैन । यहाँ हामी पढाउन सक्दैनौं अन्तै लैजाउ भन्नु स्कुलको गैर जिम्मेवारी हो भनेर सम्झें । विद्यार्थी कमजोर हुनुमा ८-९ वर्षदेखि पढाउने स्कुलको पनि दोष हुन् कि विद्यार्थीको मात्रै ? एउटा विद्यार्थी फेल हुँदा ऊभन्दा बढी शिक्षक र स्कुल फेल हुन्छ भनेर पढेको थिएँ।’
सुब्बाले आफ्नी छोरीलाई जस्तो व्यवहार अरु विद्यार्थीलाई नगर्नु भन्दै स्कुलबाट ट्रान्सक्रिप्ट ल्याएको उल्लेख गरेका छन् ।
https://www.facebook.com/upendra.subba/posts/10227617597857927
