काठमाडौँ । उपप्रधानमन्त्री एवं गृहमन्त्री नारायणकाजी श्रेष्ठले सुरक्षा निकायलाई दबाव र चलखेलबाट मुक्त गर्ने बताउनुभएको छ ।
गृह मन्त्रालयमा मंगलबार आयोजित पत्रकार सम्मेलनमा उहाँले सुरक्षा निकायलाई शक्ति केन्द्र र राजनीतिक दबावबाट मुक्त राख्ने उल्लेख गर्दै भन्नुभयो, “अवान्छित चलखेलबाट मुक्त राखिन्छ ।”
सुरक्षा निकाय हाम्रो गौरव हुन् भन्दै गृहमन्त्री श्रेष्ठले सुरक्षा निकायमा निष्पक्षता कायम गर्ने बताउनुभयो । उहाँले भन्नुभयो, “सुरक्षा निकायमा काम गर्ने साथीहरुको मनोबल गिर्यो, ममाथि निष्पक्ष व्यवहार भएन भन्न पर्यो भने मनोबल उठ्दैन ।” सिस्टम स्थापित गर्ने र निष्पक्षताका आधारमा पदस्थापन, बढुवा र सरुवा गरिने उहाँको भनाइ थियो ।
गृह प्रशासनमा विचौलियाको भूमिकालाई शून्यमा झार्ने प्रतिबद्धता व्यक्त गर्दै उहाँले गृह प्रशासन र प्रहरीमा यसअघि रहेको धारणा नै परिवर्तन गर्न आवश्यक रहेको औँल्याउनुभयो । उहाँका अनुसार ठूलाबडा, सम्पन्न धनीमानी, पहुँच भएका, शक्ति केन्द्रमा जान सक्नेको कुरा सुन्ने, उनीहरुले भेटघाट गर्न पाउने तर सर्वसाधारणले भेटघाट गर्न नै नपाउने एप्रोच नै चेन्ज गर्नुपर्छ ।
प्रहरीले अब गरिब, दलित, पिछडिएको, शक्ति केन्द्रमा धाउन नसक्ने जनतालाई प्राथमिकतामा राख्नुपर्ने उहाँको भनाइ थियो ।
