काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले दुःखको घडिमा स्तरहीन बनेर राजनीतिकरण नगर्न आग्रह गरेका छन् ।
आफ्ना गाडी चालक दिलबहादुर थापा (शम्भु) छतबाट खसेर घाइते भएपछि उक्त घटनालाई लिएर विभिन्न टिकाटिप्पणी आउन थालेपछि सभापति लामिछानेले सामाजिक सञ्जालमार्फत यस्तो आग्रह गरेका हुन् ।
‘बिहानैदेखि निरन्तर र भर्खरैपनि मैले चिकित्सकसँग परामर्श गरे अनुसार भगवानको कृपाले उहाँको स्वास्थ्य अवस्था बिहानको भन्दा सुधारीएको छ, स्थिर छ । प्रहरी पनि अनुसन्धानमा छ । यस्तो बेला यो भन्दा धेरै मसँग तपाईलाई भन्ने कुनै शब्दै छैन । म नेताभन्दा पहिले मानिस हुँ । म पनि थाक्छु, गल्छु । मेरा आँखामा पनि आशु आउँछन् । बिन्ती छ, यस्तो चोट लागेको बेला सहानुभूति र प्रार्थनाको साटो नुन चुक बोकेर नआउनु होला ।’ लामिछानेले भनेका छन् ।
उनले अगाडि भनेका छन् – ‘चोट लागेको बेला सहानुभूति र प्रार्थनाको साटो नुन चुक बोकेर नआउनुहोला । स्तरहिन बनेर राजनीतिकरण नगर्नु होला ।’
सिन्धुपाल्चोक बाह्रबिसे नगरपालिका वडा नं. ३ घर भएका ३९ वर्षिय थापा आज बिहान भरतपुर महानगरपालिका वडा नं. ११ स्थित रवि लामिछाने बस्ने घरको छतबाट खसेर गम्भीर घाइते अवस्थामा फेला परेका थिए । उनको खुट्टा र टाउकोमा गम्भीर चोट लागेको छ । उनको भेन्टिलेटरको सहायतामा पुरानो मेडिकल कलेज भरतपुरमा उपचार जारी छ ।
