एजेन्सी । इन्डियन प्रिमियर लिग (आईपीएल) २०२३ मा आइतबार दुई खेल खेलिए । पहिलो खेलमा मुम्बई इन्डियन्सले कोलकाता नाइट राइडर्सलाई पाँच विकेटले पराजित गर्दै लगातार दोस्रो जित हात पार्यो । यस खेलमा मुम्बईले सबैलाई चकित पार्दै रोहित शर्मालाई विश्राम दिएको थियो ।
सूर्यकुमार यादवलाई कप्तानको रूपमा टसका लागि पठाइएको थियो । मुम्बईले पहिले बलिङ गर्यो र सूर्यकुमारले कप्तानको रूपमा निर्णय लिने क्रम जारी राखे । तर, ब्याटिङको समयमा रोहित शर्मा इम्प्याक्ट प्लेयरको रुपमा ब्याटिङमा आए । यसका बाबजुद पनि सूर्यकुमार नै टोलीको कप्तान रहे ।
टसको समयमा सूर्यकुमारले पेटको समस्याका कारण रोहितले यो खेल नखेल्ने बताएका थिए । तर, उनलाई सम्भावित पाँच इम्प्याक्ट प्लेयरको सूचीमा राखिएको थियो । पछि उनलाई ब्याटिङमा आएको देखेर सबै छक्क परे । इम्प्याक्ट प्लेयरको रुपमा ब्याटिङ गर्दै रोहितले १३ बलमा २० रन बनाएका थिए । उनलाई सुयश शर्माले आउट गरेका थिए । खेल मुम्बईले पाँच विकेटले जितेको थियो । टोलीले १७.४ ओभरमा १८६ रनको लक्ष्य पुरा गरेको थियो । खेलपछि समेत नियमित कप्तान रोहितको स्थानमा कप्तानको भूमिकामा सूर्यकुमार मात्रै बोल्न आएका थिए ।
यस वर्षको आईपीएलमा भारतीय क्रिकेट कन्ट्रोल बोर्ड (बीसीसीआई)ले लागू गरेको इम्प्याक्ट प्लेयर नियमअनुसार वैकल्पिक खेलाडीले ब्याटिङ, बलिङ र फिल्डिङ गर्न सक्छन् तर कप्तान भने हुन सक्दैनन् । रोहित मुम्बईका नियमित कप्तान हुन् तर टसको समयमा सूर्यकुमार आए । यस्तो अवस्थामा उक्त खेलमा सूर्यकुमार मात्रै कप्तानको भूमिकामा देखिए । सोही नियमका कारण रोहितले कप्तानी गर्न सकेनन् ।
खेलको कुरा गर्दा पहिले ब्याटिङ गरेको कोलकाताले २० ओभरमा ६ विकेट गुमाएर १८५ रन बनाएको थियो । वेंकटेश अय्यरले ५१ बलमा १०४ रनको उत्कृष्ट इनिङ खेले । आफ्नो इनिङ्समा उनले ६ चौका र ९ छक्का प्रहार गरे । जवाफमा मुम्बईले १७.४ ओभरमा लक्ष्य पूरा गर्यो । इशान किशनले २५ बलमा ५ चौका र ५ छक्का प्रहार गर्दै ५८ रनको इनिङ खेले । कप्तान सूर्यकुमारले २५ बलमा ४३ र तिलक वर्माले २५ बलमा ३० रन बनाए । अब मुम्बईले अप्रिल १८ मा सनराइजर्स हैदरावादको सामना गर्नेछ ।
