काठमाडौँ । नेकपा (एमाले) का नेता ठाकुर गैरेले प्रधानमन्त्री पुष्पकमल दाहाल प्रचण्डलाई व्यवस्था संकटमा परेको भनी व्यक्त गर्नुभएको भनाइ सदनमा आएर जानकारी गराउन आग्रह गर्नुभएको छ ।
आइतबार प्रतिनिधिसभाको बैठकमा उहाँले नयाँ वर्षको दिन पार्टी कार्यालयमा प्रधानमन्त्री प्रचण्डले यो व्यवस्था संकटमा पर्यो, उल्टिन लाग्यो भनी दिनुभएको अभिव्यक्तिप्रति सांसद गैरेले कसले व्यस्था उल्ट्याउन खोजेको हो भनी प्रश्न गर्नुभयो ।
उहाँले प्रधानमन्त्री प्रचण्डलाई प्रश्न गर्दै भन्नुभयो, “नयाँ वर्षको दिन पार्टी कार्यालयमा यो व्यवस्था संकटमा पर्यो, यो उल्टिन लाग्यो भनेर के सन्देश दिन खोज्नुभएको हो ? यो सार्वभौम संसद् चलिरहेका बेलामा प्रधानमन्त्रीले यो व्यवस्थामाथि संकट आएको हो भने सदनमा आउन पर्यो सदनलाई जानकारी गराउनुपर्छ ।”
कसले व्यवस्था उल्ट्याउन खोज्यो, कसको कारणले संकट पैदा भएको हो भन्दै उहाँले व्यवस्थामाथि भएका सबै चुनौती सामना गर्न संसद तयार हुनुपर्ने बताउनुभयो ।
