एजेन्सी । इन्डियन प्रिमियर लिग (आईपीएल) क्रिकेटमा पञ्जाब किंग्सले लिग चरणको रोमाञ्चक खेलमा लखनउ सुपरजायन्ट्सविरुद्ध २ विकेटले जित हात पारेको छ ।
लखनउको एकना स्टेडियममा शनिबार साँझ टस हारेर पहिले ब्याटिङ गरेको लखनउले २० ओभरमा ८ विकेट गुमाएर १६० रन बनाएको थियो । जवाफमा पञ्जावले १९.३ ओभरमा ८ विकेट गुमाएर लक्ष्य पुरा गर्यो ।
लखनउका कप्तान केएल राहुलले सुरुदेखि अन्त्यसम्म लामो इनिङ खेले । अर्को तर्फ विकेट झर्दै गयो तर राहुल एक छेउमा अडिग रहे । उनले यो सिजनको पहिलो अर्धशतक ४० बलमा बनाए । राहुलले ७४ रन बनाएर आफ्नो टोलीको स्कोर १५० भन्दा माथि पुर्याएका थिए । यो इनिङ्ससँगै उनले आईपीएलमा ४ हजार रन पूरा गरेका छन् ।
पञ्जाबका कप्तान साम करनले पहिलो इनिङ्समा ३ विकेट लिए भने कागिसो रबाडाले २ विकेट लिएर लखनउलाई ठूलो स्कोर बनाउनबाट रोके । १६० रनको लक्ष्य पछ्याएको पञ्जावले पावरप्लेमा ३ विकेट गुमाएको थियो । ५ नम्बरमा ब्याटिङ गर्न आएका सिकन्दर राजाले पञ्जावको इनिङ्स सम्हालेका थिए । उनले अन्तिमसम्म ब्याटिङ गर्दै आफ्नो अर्धशतक पूरा गरे र टोलीलाई जित दिलाए । उनले ४१ बलमा ५७ रन जोडे ।
कप्तान केएल राहुलले इनिङ्सको १५ औं ओभरमा लेग स्पिनर रवि बिश्नोईलाई पहिलो पटक बलिङ गर्न बोलाए । उनले साम करणपछि सिकन्दर राजालाई पनि पेभिलियन पठाए तर बिश्नोईले खेलमा २.३ ओभर मात्र बलिङ गर्न सके । उनले ४ ओभर बलिङ गरेको भए खेल यति नजिक जाने थिएन ।
शाहरुख खानले पिचमा आउनेबित्तिकै मार्क वुडलाई पहिलो बलमा छक्का प्रहार गरे । उनले १९ औं ओभरमा वुडलाई छक्का प्रहार गरे र अन्तिम ओभरमा ३ बलमा आवश्यक ७ रन बनाए । १० बलमा २३ रन जोड्दै उनी नटआउट रहे ।
साम करणले ३ विकेट लिए भने कागिसो रबाडाले २ विकेट लिए । यस्तै, अर्शदीप सिंह, हरप्रीत ब्रार र सिकन्दर राजाले एक–एक विकेट लिए ।
टस हारेर ब्याटिङ रोजेको लखनउलाई केएल राहुल र काइल मेयर्सले राम्रो सुरुवात गरेका थिए । दुवैले ६ ओभरमा बिना विकेटको क्षतिमा ४९ रन बनाएका थिए । मेयर्स ८ औं ओभरमा २९ रन बनाएर आउट भए । दुवैले पहिलो विकेटका लागि ५३ रनको साझेदारी गरे ।
लखनउका बाँकी ब्याट्सम्यानमा काइल मेयर्सले २९, दीपक हुडाले २, क्रुणाल पाण्ड्याले १८ र मार्कस स्टोइनिसले १५ रन बनाए । कृष्णप्पा गौतम र निकोलस पूरनले खाता खोल्न सकेनन् । आयुष बडोनी ५ र रवि बिश्नोई ३ रन बनाएर नटआउट रहे ।
१६० रनको लक्ष्य पछ्याएको पञ्जाबलाई पहिलो ओभरमै झट्का लागेको थियो । अथर्व तायडे क्याच आउट भए । तेस्रो ओभरमा प्रभसिमरन सिंह (४) र छैटौं ओभरमा म्याथ्यु सर्ट (३६) पनि पेभिलियन फर्किए । टिमले निर्धारित ६ ओभरमा ३ विकेट गुमाएर ४५ रन बनाएको थियो । लखनउका रवि बिश्नोई, मार्क वुड र युधवीर सिंहले ले २–२ विकेट लिए । कृष्णप्पा गौतम र कृणाल पाण्ड्याले १–१ विकेट लिए ।
आजको खेलः मुम्बई इन्डियन्स भर्सेस कोलकाता नाइट राइडर्स, दिउँसो ३ः४५ बजे
गुजरात टाइटन्स भर्सेस राजस्थान रोयल्स। साँझ ७ः४५ बजे
नोटः यसअघि लखनउको ठाउँमा हेडलाईनमा गुजरात भएकोमा सच्चाइएको छ ।
