काठमाडौं । नेकपा (माओवादी केन्द्र)का नेता वर्षमान पुनकी आमा तीर्थमालीमाथि गोली प्रहार गर्ने व्यक्ति कायममुकायम प्रधानन्यायाधीश हरिकृष्ण कार्कीको सुरक्षामा खटिने सुरक्षाकर्मी रहेको खुलेको छ ।
गएराति ९ बजेतिर बालुवाटारस्थित पुनकै निवासमा प्रहरी सहायक हवलदार प्रकाश पुन मगरले गोली प्रहार गरेका हुन् । उनी नाताले तीर्थमालीका नाति रहेको प्रहरीले जनाएको छ ।
नयाँ वर्ष मनाउन पुनको निवास पुगेका मगरले पुनकी आमा ७४ वर्षीया तीर्थमालीमाथि गोली प्रहार गरेको प्रहरीले जनाएको छ ।
प्रहरीले घटनास्थलबाट चिनियाँ पेस्तोल ‘टाइप–५४’ बरामद गरेको छ । मगर नयाँ वर्ष मनाउन गए राति वर्षमानको निवासमा गएका थिए ।
वर्षमानकी आमाको गोडामा गोली लागेको छ । ट्रमा सेन्टरमा उनको उपचार जारी छ । घटनाबारे उपत्यका अपराध अनुसन्धान कार्यालयले अनुसन्धान गरिरहेको जनाएको छ ।
