काठमाडौं । इन्डियन प्रिमियर लिग (आईपीएल)मा आज बिहिबारको खेलमा पन्जाब किंग्स र गुजरात टाईटन्सबीच प्रतिस्पर्धा हुँदैछ । पन्जाबको घरेलु मैदान बिन्द्रा स्टेडियम मोहालीमा हुने खेल नेपाली समय अनुसार बेलुकाको ७:४५ बजेबाट सुरु हुनेछ ।
पन्जाब र गुजरात दुवैले यस सिजनको चौथो खेल खेल्दैछन् । दुवै टोलीले तीन खेलमा समान दुई खेलमा जित हात पारेका छन् ।
पहिलो खेलमा गुजरातले चेन्नाई सुपर किंग्स र दोस्रो खेलमा दिल्ली क्यापिटल्सलाई पराजित गरेको थियो। यस्तै, तेस्रो खेलमा गुजरात कोलकत्ता नाईटराईडर्ससँग पराजित भएको थियो ।
उता, पन्जाबले पहिलो खेलमा कोलकत्ता नाईटराईडर्स र दोस्रोमा राजस्थान रोयल्सलाई पराजित गरेको थियो । तेस्रो खेलमा भने सनराईजर्स हैदराबादसँग पराजित भएको थियो ।
गुजरात अंक तालिकाको चौथो स्थानमा रहेको छ भने पन्जाब अंक तालिकाको छैटौं स्थानमा छ । आजको खेलको विजेता अंक तालिकाको तेस्रो स्थानमा उक्लनेछ।
अस्वस्थताका कारण यस अघिका तीन खेल गुमाएका पन्जाबका अलराउन्डर लियम लिभिङ्गस्टोन मोहालीले आजको खेल खेल्ने सम्भावना रहेको छ ।
यस्तै, कोलकत्ताविरुद्धको खेलमा टिममा नरहेका गुजरातका कप्तान हार्दिक पान्ड्याले पनि आजको खेल खेल्ने सम्भावना रहेको छ ।
गुजरात र पन्जाबबीच हालसम्म २ खेल भएको छ । जसमा दुवै टोलीले एक एक खेल जितेका छन् ।
