काठमाडौं । राष्ट्रिय स्वतन्त्र पार्टी (रास्वपा) का सांसद डा. ढाकाकुमार श्रेष्ठले अडियो एडिट गरेर आफूलाई सुनुयोजित रुपमा फसाउन खोजिएको दाबी गरेका छन् ।
पार्टी कार्यालयमा पत्रकारहरुसँग कुरा गर्दै उनले व्यवसायी दुर्गा प्रसाईंसँग दुई करोड डिल गरेको अडियो झुटो भएको बताएका छन् ।
उनले आफू हिजोबाटै न्यायालयमा गइसकेकाले क्लिन चिट लिएर आउने बताउँदै भने – ‘ न्यायालय गइसकेको छु । क्लिन चिट लिएर यसरी नै तपाईहरुमाझ प्रेस मिट गरेर आउनेछु । त्यतिन्जेल धैर्य गर्नुहोला । मेरो कारणले उपनिर्वाचनको बेला पार्टीलाई अप्ठेरो परेकाले क्षमापार्थी छु ।’
उनले उक्त अडियोलाई ध्यानमा नराखी रास्वपाका तीनै क्षेत्रका उम्मेदवारलाई जिताउन आग्रह समेत गरे ।
‘ यो अडियो केही पनि होइन । सुनुयोजित हो । जनवरीताका भएको अडियो अहिले ल्याएर हाल्नु भनेको पार्टीलाई चारैतिरबाट प्रहार गरिएको हो ।’ उनले भने ।
