काठमाडौँ । चलचित्र विकास बोर्डका कार्यकारी अध्यक्ष भुवन केसीले कुन निर्माताको फिल्मले कति कमाई गर्यो भन्ने कुराको जानकारी सरकारलाई नहुने बताएका छन् ।
सामाजिक सञ्जालमार्फत अध्यक्ष केसीले कुन फिल्मले कती कमायो, कुन वितरक र हलवालाले कति कमाई गरे भन्नेबारे सरकारलाई जानकारी र अर्थ नहुने बताउँदै देशभरका हल बक्स अफिसमा जोडिएको र त्यहाँबाट बक्स अफिसमा देखिएको तथ्याङ्क नै आधिकारिक रहेको प्रस्ट पारेका हुन् ।
अभिनेता तथा निर्माता दिपक राज गिरीले आफ्नो चलचित्र छक्कापञ्जा ४ ले व्यापार गरेको भनेको रकम गलत भएको दाबी गरेपछि अध्यक्ष केसीले यस्तो प्रतिक्रिया जनाएका हुन् । चलचित्र विकास बोर्डले बक्स अफिसको तथ्यांकलाई आधार मान्दै मंगलबार २०७९ सालमा प्रदर्शित सबै चलचित्रहरूको ग्रस आम्दानीको सूची सार्वजनिक गरेको थियो ।
‘हामी नेपाली चलचित्र उद्योग समुन्नत र समृद्धि हुनुपर्छ भन्छौं । अहिलेको समयमा यसको लागि पारदर्शीकता हुनु जरुरी छ । कुन निर्माताको मुखमा कुन फिल्मले कती कमायो, कुन वितरक र हलवालाको मुखमा कति कमायो त्यसको सरकारलाई जानकारी र अर्थ हुँदैन ।’ अध्यक्ष केसीले भनेका छन् ।
यस्तै, अध्यक्ष केसीले नेपाल सरकारले लागु गरेको बक्स अफिस लागु नगर्ने हल कानुनको दायरामा आउने समेत बताएका छन् ।
