एजेन्सी । इन्डियन प्रिमियर लिग (आईपीएल) अन्तर्गत आज लिग चरणको खेलमा दिल्ली क्यापिटल्स (डिसी) र मुम्बई इन्डियन्स (एमआई) बीच खेल हुँदैछ । खेल दिल्लीको अरुण जेटली स्टेडियममा साँझ ७ः४५ बजे सुरु हुनेछ ।
अर्कोतर्फ आज दुवै टोली मैदानमा उत्रिएपछि उनीहरुको नजर यस सिजनमा आफ्नो अंकको खाता खोल्नेतर्फ केन्द्रित हुनेछ । दिल्लीले हारको ह्याट्रिक गर्दै १६ औं संस्करणको आईपीएल यात्रा जारी राख्दा मुम्बई इन्डियन्सले पनि दुई खेलमा हार बेहोरेको छ ।
यो सिजन दिल्ली क्यापिटल्सको सुरुवात राम्रो हुन सकेन । उसले सुरुवाती तीन खेलमा हार बेहोरेको छ । टोली पहिलो जितको खोजीमा छ । दिल्ली पहिलो खेलमा लखनउसँग ५० रनले, दोस्रो खेलमा गुजरातसँग ६ विकेटले र तेस्रो खेलमा राजस्थानसँग ५७ रनले पराजित भएको थियो ।
मुम्बई विरुद्धको टोलीका लागि ४ विदेशी खेलाडीमा डेभिड वार्नर, रोभम्यान पावेल, रिले रुसो र एनरिच नोर्ट्या हुन सक्छन् । यिबाहेक अक्षर पटेल, मनिष पाण्डे र कुलदीप यादवले पनि टिमलाई पूर्ण सहयोग गरिरहेका छन् ।
अर्कोतर्फ भारतीय कप्तान रोहित शर्माको नेतृत्वमा रहेको मुम्बईको टोलीले पनि पहिलो दुई खेलमा एकतर्फी हार बेहोरेको थियो । पहिलो खेलमा रोयल च्यालेन्जर्स बैंग्लोर (आरसीबी)सँग ८ विकेटले पराजित भएको थियो भने अन्तिम खेलमा चेन्नई सुपर किंग्स (सीएसके)सँग सात विकेटले पराजित भएको थियो ।
दिल्ली विरुद्धको टोलीका लागि ४ विदेशी खेलाडीमा क्यामरन ग्रीन, ट्रिस्टन स्टब्स, टिम डेभिड र जेसन बेहरेनडोर्फ हुन सक्छन् । यी बाहेक रोहित शर्मा, इशान किशन र सूर्यकुमार यादवले पनि टोलीलाई बलियो बनाएका छन् ।
हेड टु हेड
आईपीएलको यो सिजनमा दिल्ली क्यापिटल्स र मुम्बई इन्डियन्स पहिलो पटक आमनेसामने हुँदैछन् । तर, यी दुई टोलीबीचको आइपीएल खेलका आधारमा यदि हेड टु हेडको कुरा गर्ने हो भने यी दुई कुल ३२ खेलमा भिडेका छन् । रोहित शर्माको कप्तानीमा रहेको मुम्बईले १७ खेल जितेको छ भने दिल्लीले १५ खेल जितेको छ ।
दिल्लीको अरुण जेटली स्टेडियमको पिचले ब्याट्सम्यानलाई सहयोग गर्छ । यो मैदान एकदमै सानो छ, जसका कारण ब्याट्सम्यानले सजिलै ठूला प्रहार गर्न सक्छन् । खेलको दिन दिल्लीको मौसम सफा हुने, अझै गर्मी हुने अनुमान गरिएको छ । तापमान २३ देखि ३७ डिग्री सेल्सियस बीच हुनेछ । पानी पर्ने सम्भावना छैन ।
दुबै टिमका सम्भावित सुरुवाती–११
दिल्ली क्यापिटल्सः डेभिड वार्नर (कप्तान), अभिषेक पोरेल (विकेटकीपर), रोभमान पावेल, रिले रुसो, मनिष पाण्डे, अक्षर पटेल, कुलदीप यादव, ललित यादव, एनरिक नोर्त्या, मुकेश कुमार र खलील अहमद ।
मुम्बई इन्डियन्सः रोहित शर्मा (कप्तान), इशान किशन (विकेटकीपर), क्यामरन ग्रीन, सूर्यकुमार यादव, तिलक वर्मा, ट्रिस्टन स्टब्स, टिम डेभिड, जेसन बेहरेनडोर्फ, अरशद खान, रितिक शोकिन र पियुष चावला ।
अंकतालिकाः
