एजेन्सी । स्पेनिस फुटबल लिग ला लिगा अन्तर्गत रियल मड्रिडले हार ब्यहोरेको छ । गएराति भएको खेलमा रियल आफ्नै घरेलु मैदानमा भिल्लारियलसँग ३–२ गोलले पराजित भएको हो ।
रियल मड्रिडले घरेलु मैदानमा अग्रता भने आत्मघाती गोलबाट बनाएको थियो । खेलको १६ औं मिनेटमा भिल्लारियलका पाउ टोरेसले आत्मघाती गोल गरेका थिए । ३९ औं मिनेटमा सामुएल चुक्वेजेले गोल गर्दै भिल्लारियललाई १–१ को बराबरीमा ल्याए ।
४८ औं मिनेटमा भिनियिसयस जुनियरले गोल गर्दै रियललाई २–१ को स्थितीमा अघि बढाए । तर, ७० औं मिनेटमा जोसे लुइस मोरालेसले गोल गर्दै भिल्लारियललाई २–२ को बराबरीमा ल्याए । यस्तै ८० औं मिनेटमा चुक्वेजेले व्यक्तिगत दोस्रो तथा टिमका लागि तेस्रो गोल गर्दै भिल्लारियललाई जित दिलाए ।
यो नतिजासँगै २८ खेलबाट ५९ अंकसहित रियल मड्रिड तालिकाको दोस्रो स्थानमा यथावत रहँदा भिल्लारियल समान खेलबाट ४७ अंकसहित पाँचौं स्थानमा छ ।
