गोरखा । आन्तरिक तथा बाह्य पर्यटकलाई आकर्षित गर्न गोरखाको गोरखानगरपालिका वडा नं ६ स्थित समि चौतारा नजिक ढुङ्गाको बगैँचा ‘स्टोन पार्क’ बनाउने अभियान सुरु भएको छ ।
सो स्थानमा रहेका विशाल ढुङ्गाहरुमा विभिन्न कलात्मक आकृतिहरु बनाई प्राकृतिक पर्यटकीय गन्तव्य बनाउने अभियान सुरु भएको हो । ढुङ्गाको बगैँचा बनाउनका लागि प्राविधिकरुपमा परीक्षण र विस्तृत योजनाको कार्य भइरहेको अभियानमा सक्रिय डा सन्दीप गोरखालीले जानकारी दिनुभयो ।
ढुङ्गे बगैँचामा रहेका ढुङ्गाहरुको स्वरुप नबिगारिकन तिनलाई विभिन्न आकृति दिनुका साथै घुमफिर गर्न आउनेहरुका लागि केही समय बिताउन आवश्यक पर्ने अन्य व्यवस्था मिलाउने तयारी भइरहेको पनि उहाँले जानकारी दिनुभयो ।
गोरखा बजारबाट केही मिनेटको दूरीमा रहेको सो स्थान छोटो समयमा लागि सुन्दर गन्तव्य बन्ने सक्ने उहाँले जानकारी दिनुभयो ।
नागरिकस्तरबाट सुरु भएको अभियानका बारेमा केही समयअघि गोरखा नगरपालिकाका प्रमुख कृष्ण रानाले समेत अवलोकन गर्दै नगरपालिकाका तर्फबाट सक्दो सहयोग गर्ने आश्वसन दिनुभएको थियो । पैदल मार्गबाट जंगलको बीच बाटोबाट ऐतिहासिक गोरखा दरबार जाने स्थान नजिकै रहेको उक्त स्थान पदयात्राका लागि समेत उपयुक्त गन्तव्य हुने अभियन्ताहरुले जनाएका छन् ।
अभियानमा नागरिकको सहभागिता र अपनत्वका लागि दैनिक एक रुपैयाँका दरले गरी वर्षको ३६५ रुपैयाँ सहयोगका लागि आह्वान गर्ने तयारी भइरहेको गोर्खालीले जानकारी दिनुभयो । उहाँले भन्नुभयो, “यहीँबाट पृथ्वीनारायण शाहले बिसे नगर्चीसँग एक रुपैयाँ लिएर नेपाल एकीकरणको अभियान सुरु गर्नुभएको थियो । हामीले देश तथा विदेशमा रहेका गोर्खालीहरुलाई एकताको सूत्रमा जोड्न दैनिक एक रुपैयाँ सहयोगको अवधारणा अघि बढाएका छौँ ।”
देशभित्र र विभिन्न मुलुकका यस्ता प्राकृतिक बगैँचाहरु पर्यटकहरुका लागि आकर्षक गन्तव्य बनेका छन् ।
