काठमाडौँ । नेकपा (माओवादी केन्द्र) का सांसद लेखनाथ दाहालले संसद्को १०० दिनको समीक्षा गर्नुपर्ने बताएका छन् ।
बिहीबार प्रतिनिधिसभाको बैठकमा उहाँले सदनमा सरकारको सय दिनको समीक्षा भए पनि संसद्को समय दिनको समीक्षा हुन नसकेको बताउनुभयो ।
सांसदहरु संसद् भवनमा पसेको सय दिन भएको भन्दै उहाँले यसको पनि समीक्षा हुनुपर्ने बताउनुभयो ।
सरकार निर्माण भएको सय दिनको समीक्षा सदनमा भइरहेको उल्लेख गर्दै सांसद दाहालले भन्नुभयो, “सरकारको समीक्षा गर्दा माननीयज्यूहरुलाई मेरो आग्रह छ, पुरानो जगमा उभिएर नयाँ वस्तु देख्न सकिन्न । हामीले अब सत्यको जगमा उभिएर आलोचना र टिप्पणी गर्नुपर्छ ।”
सय दिनमा सरकारले सकारात्मक सन्देश दिएको उहाँको भनाइ थियो । “पासपोर्टको लाइन बस्नुपर्ने युवाहरुलाई गएर सोध्न सक्नुहुन्छ । वैदेशिक रोजगारमा गएका युवाहरु सामाजिक सुरक्षामा जोडिएका छन् । साना साना कुराहरु जनताको दैनिकी समस्याहरु समाधानमा केन्द्रित भएको छ”, उहाँले भन्नुभयो ।
आर्थिक सुचकांकमा सुधार देखिएको, रासायनिक मल समयमै ल्याउने गरी टेण्डर भएको उहाँले बताउनुभयो ।
