काठमाडौं । सहिद स्मारक ए डिभिजन लिग क्लब चर्च ब्वाइज युनाइटेडका मुख्य प्रशिक्षक प्रदीप हुमागाईंले क्लब छाडेका छन् ।
नेपाली राष्ट्रिय टिमको प्रशिक्षकको समेत जिम्मेवारी सम्हाल्ने मौका पाएका हुमागाईंले नेपालमा काम गर्न वर्क परमिट (श्रम स्वीकृति) नपाएपछि क्लब छाडेका हुन् ।
नेपाली मुलका अमेरिकन नागरिक रहेका हुमागाईंले लिगको छैटौं चरणसम्म आइपुग्दा पनि वर्क परमिट (श्रम स्वीकृति) बिना नै क्लबसँग काम गरिरहेका थिए ।
लिगअघिको प्रि म्याच कन्फ्रेन्समा उपस्थित भएका उनी लिगको दौरानमा भने पोष्ट म्याच कन्फ्रेन्समा उपस्थित भएका थिएनन् ।
मोफसलका गोल्डकपमा भने उनले क्लबसँग काम गरेका थिए । चर्च ब्वाइजले जीतपुर सिमरा गोल्डकपको उपाधि जित्दा उनी उत्कृष्ट प्रशिक्षकसमेत घोषित भएका थिए ।
हुमागाईंले बुधबार बिहान सामाजिक सञ्जालमा स्ट्याटस लेखेर क्लब छाडेको जनाएका छन् । उनले खेलकुद शारिरिक, मानशिक क्षमताको प्रदर्शन मात्र नभई अनुशासन, निति र नियमको पालना पनि रहेको बताएका छन् ।
हुमागाईंले फेसबुकमा लेखेका छन्, ‘खेलकुद शारिरिक, मानशिक क्षमताको प्रदर्शन मात्र हैन, अनुशासन, निति र नियमको पालना पनि हो । नेपाली फुटबल खेल प्रतिको अगाध माया र यसको सुदृढिकरणप्रति केही गर्न सकिन्छ कि भन्ने हेतुले केहि समयदेखि जन्मभूमि मै रहेर फुटबल प्रशिक्षण गरिरहेको थिए, तर नेपालको प्रचलित कानुन, फिफा, एन्फा र एएफसीको नियमानुसार मैले (अमेरिकी नागरिकता भएका कारण) नेपालमा प्रशिक्षण गर्न श्रम स्विकृति (वर्क परमिट) लिनु पर्ने र सो प्राप्त गर्न नसकेका कारण हिजो अप्रिल ४ देखि मैले अफिसियल कोचका रूपमा प्रशिक्षण गरिरहेको चर्च व्वाईज क्लब छोडेको जानकारी गराउन चाहन्छु । क्लब, खेलाडी र फुटबलसँग नेपाली खेल मैदानमा सँगै जोडिन नपाउँदा खल्लो अनुभूति भएपनि मेरो मन, मस्तिष्क र हृदय भरि नेपाली फुटबलको उज्जवल भविश्य र सफलता सधैँ रहिरहेको र रहिरहनेछ । जय नेपाली फुटबल ।’
छैटौं चरणसम्म आइपुग्दा ६ खेलमा अपराजित रहेको चर्च ब्वाइज तीन जीत र तीन बराबरीका साथ १२ अंक जोड्दै तालिकाको दोस्रो स्थानमा रहेको छ ।
