एजेन्सी । १६ औं संस्करणको इन्डियन प्रिमियर लिग (आईपीएल)मा कोलकाता नाइट राइडर्स समस्यामा परेको छ । पहिलो समस्या टोलीका कप्तान श्रेयस अय्यर चोटका कारण प्रतियोगितामा सहभागी भएनन् ।
अब टिमका स्टार अलराउन्डर पनि आईपीएलमा टिमसँग नरहने भएका छन् । खेलकुद वेबसाइट क्रिकबजका अनुसार बंगलादेशका कप्तान शकिबले मंगलबार यो जानकारी दिएका हुन् ।
शकिबका अनुसार उनले बंगलादेशका लागि आयरल्यान्डविरुद्धको टेस्ट खेल्न बाँकी छ । त्यसपछि व्यक्तिगत कारणले उनले यस वर्षको प्रतियोगितामा सहभागी नहुने बताएका हुन् ।
अर्कोतर्फ केकेआर र बंगलादेश टोलीका खेलाडी लिटन दास पनि आयरल्याण्डविरुद्धको टेष्ट खेलपछि मात्र केकेआरको क्याम्पमा सामेल हुनेछन् ।
१.५ करोडमा बिक्रि भएका थिए शकिब
आईपीएल २०२३ को लिलामीमा केकेआरले साकिब अल हसनलाई १.५ करोडमा किनेको थियो । क्रिकबजको रिपोर्टका अनुसार सिजन अघि नै फ्रेन्चाइजी र शकिबबीच खटपट भएको थियो । बीसीबी अर्थात बंगलादेश क्रिकेट बोर्डले शकिब र लिटन दासलाई रिहा गर्न अस्वीकार गरेको छ । ताकि दुवै मिरपुर टेस्टको हिस्सा बन्न सकुन् ।
सुरुमा साकिब र दास टेस्ट म्याच छाडेर केकेआरको हिस्सा बन्न सक्छन् भन्ने फ्रेन्चाइजीलाई लागेको थियो तर त्यसो भएन ।
बंगलादेश क्रिकेट बोर्डले मे ९ बाट बंगलादेश र आयरल्याण्डबीच ३ खेलको एकदिवसीय सिरिज हुने जनाएको छ । जसका कारण लिटन दास मे १ गतेसम्म मात्रै टिममा आउन सक्नेछन् । लिटन दसलाई केकेआरले ५० लाखको आधार मूल्यमा किनेको थियो । लिटनले केकेआर व्यवस्थापनलाई आफूले लिग खेल्ने जानकारी दिएका छन् । उनी १० अप्रिलमा कोलकाता पुग्नेछन् । केकेआरले फाफ डु प्लेसिसको नेतृत्वमा रहेको आरसीबीसँग अप्रिल ६ मा कोलकाताको इडेन गार्डेनमा खेल्नेछ ।
