काठमाडौँ । गुजरात टाइटन्सका प्रमुख ब्याट्सम्यान केन विलियम्सन इन्डियन प्रिमियर लिग (आइपिएल) २०२३ गुमाउने भएका छन् ।
शुक्रबार राती भएको चेन्नई सुपर किंग्सविरुद्धको पहिलो खेलमा फिल्डिङ गर्नेक्रममा घाइते भएपछि विलियम्सनले आइपिएल २०२३ गुमाएका छन् ।
शुक्रबार नरेन्द्र मोदी स्टेडियम अहमदाबादमा भएको खेलमा फिल्डिङ गर्नेक्रममा विलियम्सनको बायाँ घुँडामा चोट लागेको थियो ।
टाइटन्सका तीव्र गतिका बलर जोशुवा लिटिलको बलमा डिप स्क्वायर लेगमा ऋतुराज गायकवाडले हानेको सट छक्का बचाउन खोज्दा उनी घाइते भएका थिए ।
उत्कृष्ट फिल्डिङ गरेका विलियम्सनले उक्त बलबाट छक्का हुन बचाउँदै टोलीको महत्वपूर्ण दुई रन रोकेका थिए । तर ल्यान्डिङ गर्नेक्रममा दायाँ खुट्टाको घुँडामा चोट लागेको थियो । त्यसपछि उनले मैदान छाडेका थिए । उनको स्थानमा गुजरातले इम्प्याक्ट प्लेयरको रुपमा साइ सुदर्शनलाई खेलाएको थियो ।
गुजरातले विलियम्सनले आइपिएल २०२३ को पुरै खेल गुमाउने औपचारिक रुपमा बताएको छ । विलियम्सनले हैदराबादपछि पहिलो पटक गुजरातबाट खेलेका थिए ।
न्युजिल्यान्डका कप्तान समेत रहेका विलियम्सनले २०१५ देखि २०२२ सम्म आइपिएलमा हैदराबादबाट खेल्दै उत्कृष्ट प्रदर्शन गरेका थिए । उनलाई हैदराबादले फुकुवा गरेपछि अक्सनमा गुजरातले न्यूनतम २ करोड भारुमा किनेको थियो ।
विश्व क्रिकेटकै एक सफल कप्तान विलियम्सनले ७७ आइपिएल खेलमा १८ अर्धशतकसहित कुल २ हजार १ सय १ रन बनाएका छन् ।उनलेले २०१८ को सिजनमा हैदराबादबाट ७ सय ३५ रनका साथ ओरेन्ज क्याप पनि जितेका थिए ।
न्युजिल्यान्डले आगमी अक्टोबर नोभेम्बरमा भारतमा हुने एकदिवसीय विश्वकप खेल्दैछ । तर, विलियम्सन घाईतेपछि उनले खेल्न सक्ने वा नसक्ने चिन्ता बढेको छ । उनले खेल्न नसके न्युजिल्यान्डलाई ठूलो प्रभाव पर्नेछ ।
