काठमाडौं । त्रिभुवन विश्वविद्यालय अन्तर्गतका देशभरिका क्याम्पसमा स्वतन्त्र विद्यार्थी युनियन (स्ववियु) निर्वाचनको मतदान जारी छ ।
देशभरिका ६० आङ्गिक क्याम्पस र एक हजारभन्दा बढी सम्बन्धन क्याम्पसमा आज बिहान ८ बजेदेखि मतदान सुरु भईसकेको छ । तर, त्रिविका १३ वटा क्याम्पसहरुमा भने स्ववियु निर्वाचन स्थगित भएको छ । क्याम्पसका आन्तरिक विवादका कारण ती क्याम्पसहरुमा आजलाई चुनाव रोकिएको स्ववियु निर्वाचन केन्द्रीय अनुगमन तथा समन्वय समितिले बताएको छ ।
काठमाडौं उपत्यकाभित्रका ७ र बाहिरका ६ वटा क्याम्पसमा स्ववियु निर्वाचन रोकिएको छ । काठमाडौंमा २२ आंगिक क्याम्पसहरूमध्ये अस्कल, त्रिचन्द्र, आरआर, विश्वभाषा, मिनभवन, आयुर्वेद कीर्तिपुर र पाटन गरी ७ क्याम्पसमा निर्वाचन स्थगित भएको छ ।
यस्तै, पृथ्वीनारायण क्याम्पस पोखरा, ठाकुरराम बहुमुखी क्याम्पस वीरगन्ज लगायतका क्याम्पसमा पनि स्ववियु निर्वाचन स्थगित भएको केन्द्रीय अनुगमन तथा समन्वय समितिले जनायो ।
