काठमाडौँ । राष्ट्रिय स्वास्थ्यकर्मी महासंघ नेपालको आयोजनामा काठमाडौँमा टेकुदेखि माईतिघर मण्डलासम्म वाकाथन आयोजना गरिएको छ ।
वाकाथनले महिलाहरुले घरको काम र व्यवस्थताको कारण स्वस्थ जिवन यापनको लागि समय अभाव हुने हुँदा दैनिक हिँड्न जरुरी भएको र पुरुषको सहभागिता घरको काममा समेत जरुरी भएको सन्देश प्रदान गरेको थियो ।
नेकपा (एमाले)का सचिव तथा प्रतिनिधि सभा सदस्य योगेश भट्टराईको प्रमुख आतिथ्यतामा भएको वाकाथनमा करिब २०० स्वास्थ्यकर्मीहरुको सहभागिता रहेको थियो ।
करिब ३ कि.मी. दुरी स्वस्थ्यकर्मिहरुसँगै हिँड्नुभएका एमाले सचिव भट्टराईले माईतिघरमा कोणसभालाई सम्बोधन गर्दै अन्तर्राष्ट्रिय स्तरमा ८ मार्च १९११ मा महिला कामदारमाथि भएको श्रम शोषणका विरुद्ध आवाज उठाएको बताउनुभयो ।
त्यसै दिनको सम्झनामा आज ८ मार्च मनाईरहेको प्रष्ट पार्दै उहाँले नेपालमा सहाना प्रधानले श्रमिक महिलाहरुको पक्षमा आवाज उठाउन सुरु गर्नु भएको बताउनुभयो । राष्ट्रिय स्वास्थ्यकर्मी महासंघ, नेपालको उपमहासचिव तथा महिला विभाग प्रमुख अमृता बरालको संयोजकत्वमा आयोजना भएको वाकाथनको कोणसभाको अध्यक्षता महासंको अध्यक्ष डा. झलक शर्मा गौतमले गर्नु भएको थियो ।
उपमहासचिव बरालले महिलाहरु घरको काममा सिमित हुन पुगेकोमा दुःख व्यक्त गर्दै सबै महिलाहरुले आफ्नो स्वास्थ्यमा ख्याल गर्नुपर्ने बताउनु भयो । स्वस्थ जिवयापनको लागि दैनिक हिँडनुपर्ने तथा फिजिकल व्यायाम गर्नुपर्ने उहाँको भनाई छ ।
यस्तै, महासंघको अध्यक्ष डा. गौतमले महासंघ स्वास्थ्य सेवामा समर्पित स्वास्थ्यकर्मीहरुको पेशागत अधिकारमुखी संस्था भएको प्रस्ट पार्नुभयो ।
