काठमाडौँ । कांग्रेस सभापति शेरबहादुर देउवाले प्रधानमन्त्री पुष्पकमल दाहाल ‘प्रचण्ड’सँग भेटवार्ता गर्नुभएको छ । बिहीबार बिहान प्रधानमन्त्री प्रचण्डलाई भेट्न सभापति देउवा बालुवाटार पुग्नुभएको हो ।
दुई शीर्ष नेताबीच राष्ट्रपति निर्वाचनको बारेमा छलफल भएको बताइएको छ । यस्तै, कांग्रेसबाट राष्ट्रपतिको उम्मेदवार बन्ने सम्भावित व्यक्तिको बारेमा पनि छलफल भएको बुझिएको छ ।
नेपाली कांग्रेसले राष्ट्रपतिमा वरिष्ठ नेता रामचन्द्र पौडेल र कृष्णप्रसाद सिटौलाको नाम अघि सारेको छ । यसअघि बुधबार बेलुका पनि प्रधानमन्त्रीसँग सभापति देउवासहितका कांग्रेसका नेताहरूले राष्ट्रपति चयनका विषयमा छलफल गरेका थिए ।
प्रधानमन्त्री प्रचण्ड र सभापति देउवाले निर्वाचनअघिको पाँच दलीय गठबन्धनलाई व्युँत्याउने कसरत गरिरहेका छन् । फागुन २५ गते हुने राष्ट्रपतिको निर्वाचनका लागि शनिबार (१३ गते) मनोनयन दर्ताको कार्यतालिका छ ।
