काठमाडौं । राष्ट्रिय खेलकुद परिषद(राखेप)ले राष्ट्रिय क्रिकेट टिमका स्पीनर सन्दीप लामिछानेलाई यूएई भ्रमणको लागि कुनै पहल नगर्ने भएको छ ।
नेपाल क्रिकेट संघ (क्यान)ले विदेश लैजानेबारे पहल गरिदिन भन्दै राखेपलाई लिखित पत्र पठाएको थियो । तर, अदालतको फैसलाभन्दा बाहिर गएर केही पनि गर्न नमिल्ने भन्दै राखेप यस बिषयबाट पन्छिएको छ ।
क्यानले पठाएको पत्र राखेपले दर्ता नै नगरेको बताईएको छ । राखेपबाट सन्दीपका विषयमा कुनै कानूनी पहल नहुने राखेपका सदस्यसचिव टंकलाल घिसिङले बताए । उनले भने ,‘हामीले अदालतको आदेशलाई सम्मान गर्नुपर्छ । विदेश जान नपाउने भनेर स्पष्ट आदेश भएको हुँदा हामी त्यसलाई चुनौती दिन सक्दैनौं ।’
घिसिङले अदालतको पूर्ण सुनवाइबाट मात्रै पुरानो आदेश उल्टिनसक्ने बताए । उनले राखेप प्रचलित एेन र कानूनी अभ्यासभन्दा बाहिर नजाने बताए ।
सन्दीपले राष्ट्रिय टीमबाट विदेशमा खेल्न पाउनुपर्ने माग गर्दै पाटन उच्च अदालतले गरेको फैसलाविरुद्ध सर्वोच्च अदालतमा पुनरावेदन गरेका छन् । सन्दीपले गरेको पुनरावेदनमा फागुन १२ गते (भोलि)लाई पेसी तोकिएको छ । भोलिको सुनवाइमा अदालतले उक्त रोक फुकुवा गरिदियो भने सन्दीप यूएई जान पाउछन्।
नेपालले आईसीसी विश्वकप लिग–२ अन्तर्गत फागुन १५ गतेदेखि २२ गतेसम्म यूएई र पपुवा न्युगिनीसँग शृङ्खला खेल्दैछ । एकदिवसीय मान्यता कायम राख्नका निम्ति नेपालको यो भ्रमण निर्णायक रहने भएकाले सन्दीपको उपस्थिति अत्यन्तै महत्वपूर्ण छ ।
आईसीसी विश्वकप लिग–२ त्रिकोणात्मक ओडिआई सिरिजमा सन्दीपको प्रदर्शन उच्च रहेको थियो । घरेलु मैदानमा भएको लिग २ मा चारै खेलमा सन्दीपले विकेट लिएका थिए । उनले नामिबियासँगको पहिलो खेलमा ६६ रन खर्चेर ३ विकेट लिएका थिए भने स्कटल्याण्डसँगको पहिलो खेलमा २७ रन खर्चेर ३ तथा नामिबियासँगको दोस्रो खेलमा ४६ रन खर्चेर ३ विकेट लिएका थिए । यसैगरी स्कटल्याण्डसँगको दोस्रो खेलमा ४५ रन खर्चेर ४ गरी चार खेलमा १३ विकेट लिएका थिए ।
