बुटवल । राप्रपा नेपालका अध्यक्ष कमल थापाले राजनीतिक प्रणाली, शासकीय स्वरुप र राष्ट्रिय संरचनाका विषयमा पुनरविचार हुनुपर्ने बताउनुभएको छ ।
लुम्बिनी प्रदेशको बुटवलमा आयोजित एक कार्यक्रममा पूर्वउपप्रधानमन्त्री थापाले २०६३ सालको जनआन्दोलन र त्यसपछि भएका हरेक गतिविधिले मुलुकमा शान्ति र समृद्धिको अनुभव नभएको बताउनुभयो । यस्तो अवस्थामा राजनीतिक प्रणाली, शासकीय स्वरुप र राष्ट्रिय संरचनाबारे पुनर्विचार तथा विकल्पमा बहस सुरु गर्नुपर्ने उहाँको भनाइ थियो ।
उहाँले विगतमा राष्ट्रपतिले स्वार्थ देखाएकाले नै राजनीतिक दलहरुबीच खिचातनी बढेको बताउनुभयो । अब निर्वाचित हुने राष्ट्रपतिले राजनीतिक दलका स्वार्थअनुसार काम गर्न नहुने उहाँको भनाइ थियो ।
राजनीतिक दलहरुको अस्थिरताका कारण नै मुलुकको एकता र संविधानमा धरापमा परेको भन्दै अध्यक्ष थापाले मुलुकमा विदेशी चलखेल बढ्नुमा पनि राजनीतिक दलहरु नै दोषी रहेको बताउनुभयो ।
