काठमाडौँ । नेपाली राष्ट्रिय क्रिकेट टोलीका कप्तान रोहितकुमार पौडेलले दशौं नम्बरमा ब्याटिङमा आएका करण केसीसँग केही पार्टनरसीप बनेपछि अब जित्छौं भनेर आत्मविश्वास बढेको बताएका छन् ।
‘करण दाइ र मैले एक–एक रन बटुल्दै जितौं भनेर योजना बनाइरहेका थियौँ । ओभर टन्नै थियो, त्यसैले एक एक रन बटुलेर पनि जित्नु पर्छ भनेर खेलेका थियौँ ।’ रोहितले भने ।
उनले आईसीसी क्रिकेट विश्वकप लिग टूको खेलमा स्कटल्याण्डविरुद्ध नेपाललाई ऐतिहासिक जित दिलाउन नट आउट ९१ रन बनाएका थिए ।
रोहितले ५–६ विकेट गुमाउँदासम्म जित्ने विश्वास रहे पनि त्यसपछि लगातार विकेट गएपछि के हुने हो भन्ने दबाव परेको बताए । तर ८ विकेट गुमाएपछि ब्याटिङमा आएका करण केसीसँगको साझेदारी जमेपछि आफूमा जितिन्छ भनेर विश्वास बढेको रोहितको भनाई छ । नेपाललाई जित दिलाउन महत्वपूर्ण भूमिका खेलेका कप्तान रोहित ‘प्लेयर अफ द म्याच’ घोषित भए ।
