एजेन्सी । भारतीय क्रिकेट टोलीले लगातार चौथो पटक बोर्डर–गावस्कर ट्रफी जितेको छ । दिल्ली टेस्टको तेस्रो दिन अष्ट्रेलियालाई ६ विकेटले पराजित गर्दै भारतले सिरिजमा २–० को अग्रता समेत बनाएको छ ।
भारतको यो जितको नायक बने रविन्द्र जडेजा । उनले अस्ट्रेलियाको दोस्रो इनिङ्समा ४२ रन दिएर ७ विकेट लिएका थिए । जसका कारण अष्ट्रेलिया टोली ११३ रनमा मात्र सिमित भयो । पहिलो इनिङ्समा एक रनको अग्रता लिएपछि भारतलाई जितका लागि ११५ रनको लक्ष्य दिइएको थियो । जहाँ भारतले ४ विकेट गुमाएर पुरा गर्यो ।
चेतेश्वर पुजारा र कप्तान रोहित शर्माले ३१–३१ रन बनाए । विराट कोहलीले २० रनको इनिङ खेले । पहिलो इनिङ्समा भारतले २६२ र अष्ट्रेलियाले २६३ रन बनाएको थियो ।
दुई टेस्ट बाँकी रहँदै कसरी भारतको नाममा ट्रफी ?
यो शृङ्खलामा अझै दुई टेष्ट खेलहरू बाँकी छन् । अष्ट्रेलियाले ती दुवै जितेर २–२ को बराबरी गर्न सक्नेछ । यस्तो अवस्थामा दुई खेल जितेर मात्र ट्रफी भारतको नाममा कसरी भयो भनेर जिज्ञासा रहन सक्छ । किनभने पछिल्लो बोर्डर गावस्कर ट्रफी भारतले जितेको थियो । दुई टोलीबीचको टेष्ट शृंखला ट्रफीका लागि हुँदा, सिरिज बराबरीमा परेमा पनि ट्रफी पछिल्लो पटक कब्जा गर्ने टोलीले लैजान्छ । ‘एशेज’मा पनि त्यस्तै हुन्छ ।
कोहलीले तोडे सचिन तेन्दुलकरको कीर्तिमान
विराट कोहली अन्तर्राष्ट्रिय क्रिकेटमा सबैभन्दा छिटो २५ हजार रन बनाउने ब्याट्सम्यान बने । उनले ५४९ इनिङ्समा यो स्थान हासिल गरेका हुन् । कोहलीले सचिन तेन्दुलकरको ५७७ इनिङ्सको कीर्तिमानलाई पछाडि छोडे । समग्रमा उनी विश्वका छैटौं ब्याट्सम्यान बनेका छन् भने भारतीयमा कोहली दोस्रो स्थानमा छन् ।
