सुर्खेत । नेपाली कांग्रेसका महामन्त्री विश्वप्रकाश शर्माले कांग्रेसले प्रस्ताव गरेको उम्मेदवार नै राष्ट्रपति बन्ने दाबी गरेका छन् ।
आइतबार सुर्खेतमा आयोजना गरिएको एक कार्यक्रममा बोल्दै उनले दलीय सहमतिमा नै कांग्रेसबाट राष्ट्रपति बन्ने दाबी गरेका हुन् ।
यसअघि सरकार बनाउँदा कांग्रेसको कमजोरीका कारण नेतृत्व गुमेपनि पुरानै दलीय सहमतिमा राष्ट्रपति बन्ने महामन्त्री शर्माले बताए । ‘सरकारको नेतृत्व गुमेकोमा अहिले कसैलाई दोष दिनु छैन, २५ गते राष्ट्रपतिका लागि निर्वाचनपछि कांग्रेसले प्रस्ताव गरेको व्यक्ति राष्ट्रपति भएको समाचार तपाईहरुले सुन्नुहुनेछ ।’, उनले भने, ‘एक हिसाबले हामीबाट सत्ता गुमेको हो, तर अबको राष्ट्रपति काँग्रेसको बन्छ ।’
महामन्त्री शर्माले कांग्रेस चुनावबाट सबैभन्दा ठूलो दल बनेपनि हातमा सत्ता नभएपछि कार्यकर्तामा निराशा पैदा भएको बताए । एमालेसँग माओवादीले गठबन्धन गरी सरकार बनाए पनि चुनावका बेला कांग्रेसले गरेको सहयोगको आधारमा माओवादीले कांग्रेसलाई राष्ट्रपतिमा सहयोग गर्ने विश्वास व्यक्त गरे ।
