काठमाडौँ । जिल्ला सरकारी वकिलको कार्यालय काठमाडौँले राष्ट्रिय स्वतन्त्र पार्टी (रास्वपा) का सभापति रवि लामिछानेको राहदानीसम्बन्धी विरुद्धको जाहेरी दर्ता गर्नुनपर्ने बताएको छ । सरकारी वकिलको कार्यालयले लामिछानेको राहदानीका बारेमा जिल्ला प्रहरी परिसर काठमाडौँमा छानबिन चलिरहेको सूचना आएको भन्दै जाहेरीमा केही गर्नु नपर्ने निष्कर्ष निकालेको हो ।
यसअघि लामिछानेले झुटो विवरण दिएर राहदानी लिएको भन्दै सिन्धुलीका युवराज पौडेल (सफल) ले जिल्ला प्रहरी परिसर काठमाडौँमा जाहेरी दिएका थिए । प्रहरीले लामिछानेको नागरिकता मुद्दाको फैसलाको पूर्णपाठ सर्वोच्च अदालतबाट आइनसकेको भन्दै जाहेरी दर्ता गर्न अस्वीकार गरेको थियो ।
प्रहरीले जाहेरी दर्ता गर्न नमानेको भन्दै पौडेलले जिल्ला सरकारी वकिलको कार्यालयमा निवेदन दिएका थिए । कार्यालयले प्रहरी परिसरमा छानबिन चलिरहेको भन्दै जाहेरी दर्ता गर्नुनपर्ने बताएको हो । यसअघि लामिछानेको राहदानीका विषयमा सरकारी वकिलको कार्यालयले जिल्ला प्रशासन कार्यालय काठमाडौँ, राहदानी विभाग र अध्यागमन विभागबाट विवरण मागेको थियो ।
कार्यालयले जिल्ला प्रशासन कार्यालयबाहेका अरु कार्यालयबाट जवाफ नआएको बताएको छ । जिल्ला प्रशासन कार्यालयले लामिछानेको अभिलेख भेटिएको जवाफ पठाएको छ । सरकारी वकिलको कार्यालयले प्रहरीले अनुसन्धान सकेर प्रतिवेदन पेश गरेपछि मात्र त्यसको अध्ययन गरी थप निर्णय लिइने जनाएको छ ।
