काठमाडौ । नेपाल उद्योग वाणिज्य महासंघका उपाध्यक्ष रामचन्द्र संघईले उद्योगी व्यवसायीले आवश्यकता अनुसारको जनशक्ति पाउनै नसकेको गुनासो गरेका छन् । महासंघले उद्यमशीलताका लागि दक्षिण एशीयाली नेतृत्व सेलसँगको सहकार्यमा आज काठमाडौंमा आयोजना गरेको कार्यक्रममा संघइले सक्षम जनशक्तिको अभाव श्रम बजारका लागि चुनौतीका रुपमा रहेको बताए ।
उद्यमशीलताका लागि जीवन उपयोगी शिक्षा आवश्यक रहेको बताउदै संघईले सीपमूलक र प्राविधिक शिक्षामा जोड दिनुपर्ने उल्लेख गरे । सीप र प्रविधि भएको व्यक्तिको उद्यमशीलताबाट समाज र देश नै उद्यमशील बन्न सक्छ । यसरी मात्र देशको समृद्धि सम्भव छ संघईको भनाई थियो ।
हाम्रो समाज अझै पनि उद्यम गर्ने, सानै भए पनि लगानी गर्ने, व्यवसायिक बन्ने भन्दा पनि जागिरै खाने सोंचले ग्रसित रहेको बताउदै संघाइले यसको दोष विद्यमान शिक्षा प्रणाली नै भएको उल्लेख गरे । चालु आर्थिक वर्षको पाँच महिनामा मात्रै नेपालबाट विदेश अध्ययन गर्न जाने विद्यार्थीबाट २८ अर्ब ८१ करोड रूपैयाँ विदेशिएको आंकडा प्रस्तुत गर्दै संघईले यो अवस्था आउनुको मूल कारण देशभित्र्रै अवसर नहुनु रहेको बताए ।
यस्तो अवस्था रोक्न नेपाललाई शिक्षाको अन्तर्राष्ट्रिय हवका रुपमा विकशीत गर्नुपर्ने तथा अन्तर्राष्ट्रिय ख्यातिप्राप्त विश्वविद्यालयहरूलाई समेत नेपालमा आकर्षीत गर्न सक्नुपर्ने संघईको सुझाव छ । यसका लागि सरकार र निजि क्षेत्रको सहकार्य आवश्यक रहेको उनको भनाई छ ।
