काठमाडौँ । प्रतिनिधिसभाको आइतबारको बैठकमा नेकपा (एमाले) का अध्यक्ष केपी शर्मा ओलीले बोल्दै गर्दा नेपाली कांग्रेसका सांसद रामहरि खतिवडाले नियमापत्ति गर्नुभएको छ ।
बैठकमा अध्यक्ष ओलीले सरकारको न्यूनतम साझा कार्यक्रमबारे जानकारी गराउँदा सांसद खतिवडाले प्रतिनिधिसभा नियमावललीको नियम २६ अनुसार नियमापत्ति गर्नुभयो । ओलीले न्यूनतम साझा कार्यक्रमबारे प्रतिनिधिसभा बैठकमा बोल्न नपाउने उहाँको भनाइ थियो ।
“पूर्वप्रधानमन्त्रीज्यूले बोल्ने क्रममा न्यूनतम साझा कार्यक्रमबारे बोल्नुभयो । यो सदन चलेको दिनदेखि न्यूनतम साझा कार्यक्रमबारे जानकारी गराइएको छैन, कुनै बार्दलीबाट ल्याएको कार्यक्रम संसदमा प्रस्तुन नगरियोस्”, उहाँले भन्नुभयो ।
त्यसपछि ओलीले खतिवडामाथि व्यङ्ग्य गर्दै यसअघि पनि नेपाली कांग्रेसले प्रधानमन्त्रीभन्दा अगाडि बोल्न पाऊँ भनेर सदन नै अवरुद्ध गरेको बताउनुभयो । उहाँले भन्नुभयो, “उहाँहरुले यस्तो गरिरहनुहुन्छ ।”
