काठमाडौं । नेपाली कांग्रेसका महामन्त्री गगनकुमार थापाले साना किसानहरूको समस्या समाधान गर्न सरकारसँग माग गरेका छन् ।
प्रतिनिधिसभाको बुधबारको बैठकमा बोल्दै उनले साना किसानहरूले अप्रिय निर्णय गर्नुपूर्व नै समस्याको समाधान गर्न आग्रह गरेका हुन् ।
महामन्त्री थापाले बर्डफ्ल्यू नियन्त्रण गर्नका लागि सरकारले नष्ट गरेको कुखुरा फर्मको क्षतिपूर्ति दिन माग गरे । उनले भने, ‘सयौंका संख्यामा साना किसानहरू कृषिमन्त्रालय धाइरहेका छन् । उनीहरू त्यहाँ पुग्छन्, रुन्छन् कराउँछन् । यी तीनै किसानहरू हुन् जसले बैंकबाट ऋण लिएर साना साना कुखुरा फर्महरू चलाएका छन् । बर्डफ्यू नियन्त्रण गर्नका लागि यी किसानहरूको कुखुरा फर्म नष्ट गरियो । सरकार दिन्न भन्दैन, दिन्छु भन्छ दिँदैन । सरकार झुलाउँछ किनकी सरकरलाई भ्याईनभ्याई छ । तर, बैंकले अँठ्याउँछ।’
महामन्त्री थापाल सरकारले दिन्छु रकममा गरिव जनतालाई नझुलाई दिन आग्रह गरे । उनले भने, ‘बैंकको ऋणले थिचिएका साना किसानहरूले कुनै अप्रिय निर्णय नगरेसम्म कुर्ने हो ? अनि अप्रिय निर्णय गरिसकेपछि आँसु बगाउँदै छानबिन गर्न समिति गठन गर्ने हो कि ? सरकारले दिन्छु भनेको रकम यो प्रपञ्चबाट बाहिर आएर दियौं ।’
