काठमाडौँ । भारतीय क्रिकेटर मुरली विजयले अन्तर्राष्ट्रिय क्रिकेट करिअरबाट सन्न्यास लिएका छन् । भारतबाट ६१ टेस्ट, १७ ओडिआई र ९ टि–२० खेलेका ब्याटर मुरलीले ३८ वर्षको उमेरमा सन्न्यासको घोषणा गरेका हुन् ।
मुरलीले २००८ मा अष्ट्रेलियाविरुद्ध नागपुरमा भएको टेस्टमा डेब्यू गरेका थिए । उनले हालसम्म १२ शतक र १५ अर्धशतकसहित ३ हजार ९ सय ८२ रन बनाएका छन् ।
मुरलीले २०१३ मा हैदराबादमा भएको अष्ट्रेलियाविरुद्धको खेलमा करियरकै उत्कृष्ट १ सय ६७ रनको शतकीय इनिङ खेलेका थिए । उनले अन्तिम खेल पनि २०१८ डिसेम्बरमा अष्ट्रेलियाविरुद्ध नै खेलेका थिए ।
यस्तै, मुरलीले ओडिआईमा भने २०१०मा दक्षिण अफ्रिकाविरुद्ध डेब्यू गरेका थिए । उनले त्यसै वर्ष टि–२० आईमा अफगानिस्तानविरुद्ध डेब्यू गरेका थिए ।
त्यसैगरी, २०१० को आइपिएलमा चेन्नई सुपर किंग्सबाट खेलेका मुरलीले राजस्थान रोयल्सविरुद्ध ५६ बलमा ८ चौका र ११ छक्कासहित १ सय २७ रनको शतकीय इनिङ खेलेका थिए ।
