काठमाडौं । राष्ट्रिय सभा सदस्य रामनारायण बिडारीले प्रधानमन्त्री ओली बेठिक भएका कारण राज्यका सबै संयन्त्रहरुले दुख पाएको बताउनुभयो । प्रधानमन्त्री ओलीलाई असहज हुँदा कोरोना आउने र लकडाउन हुने तर प्रधानमन्त्रीलाई सहज हुँदा कोरोना नलाग्ने जस्तो गरिने गरेको बताउनुभयो ।
राष्ट्रपतिको मुख्यकाम प्रधानमन्त्री नियुक्त गर्नु भएपनि राष्ट्रपतिले संवैधानिक काम गर्न नसकेको उहाँले बताउनुभयो । उहाँले भन्नुभयो – ‘कोरोना रोग प्रधानमन्त्रीको प्रेमिकाजस्तो बनेको छ । प्रधानमन्त्रीलाई असहज भयो कि यो उफ्रेर नेपालमा आउँछ । अनि निषेधाज्ञा, लकडाउन, बन्दाबन्दी बन्छ ।
प्रधानमन्त्रीलाई सजिलो भएपछि यो जान्छ । यसका निम्ति साइबरे सरकारीहरु सरकारी साधनमार्फत् व्यापक प्रचार गर्छन् । नेपालीलाई कोरोनाले छुँदैन । छोएपनि बिरामी हुँदैन । बिरामी भएपनि मर्दैन । यस्तो भनेर परिणामत के आयो भने अक्सिजनको अभाव भयो । औषधिको अभाव भयो । अस्पतालको अभाव भयो । भेन्टीलेटरको अभाव भयो । राष्ट्रपतिको मुख्य काम प्रधानमन्त्री नियुक्त गर्नु हो । तर गणतन्त्रको प्रतिकबाट संवैधानिक काम भएन । देश अस्तव्यस्त भयो ।’
राष्ट्रिय सभामा बोल्ने सबै सदस्यहरुले समसामयिक राजनीतिक परिस्थितिको सम्बन्धमा आफ्नो धारणा तथा विचारहरु राख्नुभएको थियो ।
