काठमाडौँ । पोखरामा आत्मदाह गर्ने एक व्यक्तिलाई बचाउने क्रममा जलेर घाइते भएकी महिलाको निधन भएको छ ।
पोखरा १३, काहुँखोलाकी सङ्गीता सापकोटाको उपचारका क्रममा पोखरा स्वास्थ्यविज्ञान प्रतिष्ठान पश्चिमाञ्चल क्षेत्रीय अस्पतालमा आइतबार राति मृत्यु भएको हो ।
शरीरको करिब ८० प्रतिशत भाग जलेको सङ्गीताको उपचारकै क्रममा राति साढे ११ बजे मृत्यु भएको जिल्ला प्रहरी कार्यालय कास्कीले जनाएको छ ।
स्टेशनरी पसल सञ्चालन गर्दै आएका ४५ वर्षीय कृष्णबहादुर क्षेत्री पेट्रोल छर्केर आत्मदाहको प्रयास गर्दैगर्दा उनलाई उद्धार गर्ने क्रममा सङ्गीता जलेर गम्भीर घाइते भएकी थिइन् ।
घाइते कृष्णको उपचार भइरहेको र उनको अवस्था खतरामुक्त रहेको अस्पतालले जनाएको छ ।
