काठमाडौँ । प्रहरीले बिहीबार १०१ थान राहदानी र पुलिस रिपोर्ट ७९ थानसहित दुई जनालाई त्रिभुवन अन्तर्राष्ट्रिय विमानस्थलबाट पक्राउ गरेको छ ।
अवैधरुपमा बाह्य मुलुकतर्फ ती पासपोर्ट र पुलिस रिपोर्ट लैजान लागेका ललितपुर महानगरपालिका–३ का ३८ वर्षीय अमित बोगटी र नवलपरासी पूर्वको विनयी त्रिवेणी गाउँपालिका–७ का ३८ वर्षीया सोनीकुमारी गुरुङलाई प्रहरीले पक्राउ गरेको हो ।
नेपाल एयरलाइन्सको उडानमार्फत काठमाडौँबाट नयाँ दिल्ली जान लागेको बेला उनीहरुलाई पक्राउ गरिएको हो । त्रिभुवन अन्तर्राष्ट्रिय विमानस्थलको अन्तर्राष्ट्रिय उडानतर्फको प्रस्थान पछाडि ब्यागेज एरियामा उनीहरुको लगेज एक्स रे गर्ने क्रममा शंकास्पद रुपमा ती राहदानी र पुलिस रिपोर्ट बाह्य मुलुकतर्फ लैजान लागेको अवस्थामा फेला परेको बताइएको छ ।
प्रहरीले सोधपुछ गर्दा ती राहदानी रोमानियामा भिसा स्ट्याम्पिङ गर्नका लागि लैजान लागेको भन्दै वैदशिक रोजगार विभागबाट जारी भएको भिसा स्ट्याम्पिङ निर्णय फाराम पेश गरिएको तर अनुसन्धानमा ती फाराममा उल्लिखित विवरण भएको राहदानी र उनीहरुबाट बरामद भएको राहदानीको विवरण फरक पर्न गएको थियो ।
प्रहरीले उनीहरुलाई आवश्यक अनुसन्धान एवं कारबाहीका लागि प्रहरी केन्द्रीय अनुसन्धान ब्यूरो पठाएको छ ।
