काठमाडौं । नेपाल क्रिकेट संघ (क्यान) का अध्यक्ष चतुर बहादुर चन्दले बलात्कारको आरोपमा निलम्बनमा परेका क्रिकेटर सन्दीप लामिछानेबारे नेपालको कानुन अनुसार अगाढी बढ्ने बताएका छन् ।
क्यानले बिहीबार आयोजना गरेको पत्रकार सम्मेलनमा बोल्दै अध्यक्ष चन्दले सन्दीपलाई टिममा फर्काउने बारेमा आफूहरु छलफलमा रहेको बताए ।
अध्यक्ष चन्दले सन्दीपको विषय गम्भीर रहेकोले नेपालको कानुन अनुसार नै अगाडी बढ्ने बताए । उनले अन्तराष्ट्रिय क्रिकेट परिषद (आईसीसी) ले नेपालको कानुनले दिएको खण्डमा सन्दीपलाई टिममा राख्न मिल्छ भनेको प्रतिक्रिया दिए ।
‘सन्दीप नेपालको चाहिँने खेलाडीमा कुनै लुकाउने पर्ने कुरा छैन । तर नेपालको कानुनले कुन किसिमको स्वीकृति दिन्छ त्यसको लागि सम्बन्धित निकायमा हामीले पहल गरेका छौं । त्यो अनुसार हामी अगाडि बढ्छौं । आइसिसीले हामीलाई के भनेको छ भने नेपालको कानुनले अनुमति दिन्छ भने तिमीहरु अघि बढ । नेपालको कानुनमा हामी छलफल गरि राखेका छौं । सम्बन्धित निकायसँग सुझाव मागेका छौं । त्यसपछि मात्रै हामी निर्णय लिन्छौं’, अध्यक्ष चन्दले भने ।
बलात्कारको आरोपमा थुनामा रहेका सन्दीपलाई गत पुष २९ मो उच्च अदालत पाटनले २० लाख धरौटीमा रिहा गर्न आदेश दिएको थियो । यद्यपि सन्दीप विदेश जान भने पाउदैनन् र उपत्यका छाड्दा मात्रै पनि उनले जिल्ला प्रहरी परिसर काठमाडौंलाई लिखित जवाफ दिनु पर्ने हुन्छ । सन्दीपले क्रिकेट खेल्न पाउने वा नपाउने भन्ने अदालतको आदेशमा उल्लेख छैन ।
