काठमाडौं । गृहमन्त्री सुधन गुरुङले देशमा फेरि गोली चल्ने अवस्था आउन नदिने प्रतिबद्धता व्यक्त गरेका छन्। जेनजी आन्दोलनका शहीदहरूको स्मृतिमा काठमाडौंमा आयोजित कार्यक्रममा बोल्दै उनले यस्तो बताएका हुन्।
गुरुङले जेनजी पुस्ताले राखेको सुशासन र परिवर्तनको अपेक्षालाई निराश हुन नदिने दाबी गरे। आफूलाई गृहमन्त्रीको जिम्मेवारीमा विश्वास गरेर पठाइएको भन्दै उनले त्यस विश्वासलाई व्यवहारबाटै प्रमाणित गर्ने बताए।
उनले पार्टी सभापति रवि लामिछानेले आफूलाई जेनजीको आशा जीवित राख्दै सुशासनको अनुभूति हुने गरी काम गर्न दिएको जिम्मेवारी स्मरण गरे।
‘जेनजीको आशालाई मर्न दिन हुँदैन, कुर्सीमा बसेर सुशासन के हो देखाउनुपर्छ’ भन्ने लामिछानेको भनाइ उद्धृत गर्दै गुरुङले आफूले पाएको विश्वास कायम राख्ने बताए।
गृहमन्त्री गुरुङले आफू मन्त्री मात्रै नभई दाइ, भाइ र छोरा पनि भएको उल्लेख गर्दै आफूहरूका लागि अर्को गोली चल्ने अवस्था नै सबैभन्दा ठूलो चिन्ताको विषय भएको बताए।
उनले देशमा अब हिंसात्मक रूपमा गोली चलाउने साहस कसैले गर्न नसक्ने दाबी गर्दै नागरिकलाई सुरक्षित वातावरण निर्माण गर्ने प्रतिबद्धता पनि व्यक्त गरे।
जेनजी आन्दोलनका क्रममा ज्यान गुमाएका युवाको बलिदानलाई स्मरण गर्दै उनले आन्दोलनले उठाएका अपेक्षा र सवाललाई राज्यले गम्भीरतापूर्वक सम्बोधन गर्नुपर्ने धारणा राखे।
