काठमाडौँ । नेपाली कांग्रेसकी सांसद ईश्वरी न्यौपानेले प्रतिनिधिसभाको सभामुखमा उम्मेदवारी मनोनयन दर्ता गराउनुभएको छ ।
कैलालीकी सांसद न्यौपाने कांग्रेस केन्द्रीय सदस्यसमेत हुनुहुन्छ । पार्टी सभापति शेरबहादुर देउवा निकट न्यौपानेले लामो समय महिल संघमा काम गर्नुभएको थियो । साथै उहाँ महिला विभाग प्रमुखसमेत हुनुहुन्थ्यो ।
यसअघि बुधबार कांग्रेस पदाधिकारीको बैठक तथा संसदीय दलको बैठकले सभामुखमा न्यौपानेलाई उठाउने निर्णय गरेको थियो ।
संघीय संसद् सचिवालयले सभामुखको मनोनयन दर्ताको समय बुधबार दिउँसो १ बजेदेखि अपराह्न ४ बजेसम्मका लागि तोकेको छ । मतदान बिहीबार हुनेछ ।
सभामुख चयनका लागि बिहीबार बिहान ११ बजे प्रतिनिधि सभा बैठक बस्दैछ।
कांग्रेसले प्रतिनिधिसभाको सभामुख पदका लागि संसद्मा प्रतिपक्षी दलहरुबाट समर्थन जुटाउने तयारी गरेको छ । यसका लागि कांग्रेसले जनता समाजवादी पार्टी (जसपा)) , नेकपा (एकीकृत समाजवादी) र लोकतान्त्रिक समाजवादी पार्टी (लोसपा) सँग छलफल गर्ने भएका हो ।
प्रतिनिधिसभामा कांग्रेसका ८९, जसपाका १२, एकीकृत समाजवादीका १० र लोसपाका ४ जना सांसद छन्।
