काठमाडौँ । प्रधानमन्त्री पुष्पकमल दाहाल प्रचण्डले मन्त्रिपरिषद् विस्तार गर्दै हुनुहुन्छ । सत्तारुढ गठबन्धन दलहरुबीच मन्त्रालय भागबन्डामा सहमति भएसँगै मन्त्रिपरिषद् विस्तार हुन लागेको हो ।
बालकोटमा सोमबार बिहान प्रधानमन्त्री प्रचण्ड र नेकपा (एमाले) का अध्यक्ष केपी शर्मा ओलीबीच मन्त्रिपरिषद् विस्तार गर्नेबारे सहमति भएको थियो ।
सहमतिअनुसार गठबन्धन दलहरुलाई ८ सांसद बराबर एक मन्त्रालय दिइने छ । जसअनुसार एमालेले ८ मन्त्री र २ राज्यमन्त्री पाउने भएको छ । अहिले एमालेबाट उपप्रधानमन्त्री एवं अर्थमन्त्री विष्णु पौडेल हुनुहुन्छ ।
तर एमालेका ३ विनाविभागीय मन्त्री भइसकेकाले मन्त्रालयको जिम्मेबारी पाइसकेका छैनन् ।
त्यस्तै सरकारको नेतृत्व गरेको नेकपा (माओवादी केन्द्र) को भागमा ४ मन्त्री र १ राज्यमन्त्री परेको छ । सरकारमा अहिले माओवादी केन्द्रबाट उपप्रधानमन्त्री नारायणकाजी श्रेष्ठ हुनुहुन्छ । माओवादी केन्द्रले पाउने अन्य मन्त्रालयको नाम टुंगो लागिसकेको छैन ।
राष्ट्रिय प्रजातन्त्र पार्टी (राप्रपा) ले ऊर्जा मन्त्रालयसहित २ र जनता समाजवादी पार्टी (जसपा) ले सहरी विकाससहित २ वटा मन्त्रालय पाउने भएका छन् ।
